Elorda boıynsha 50-den astam qasapshy biliktilik arttyrdy (FOTO)

Búgin Nur-Sultan qalasy ákimdiginiń baspasóz ortalyǵynda Qurban aıt merekesine oraı ótken baspasóz máslıhatynda qurbandyq shalynatyn oryndardyń sanıtarlyq tazalyǵy men qaýipsizdigi jaıly talqylanyp, daıyndyq sharalary tanystyryldy. Naıb múftı Naýryzbaı qajy Taǵanuly atap ótkendeı, qazirgi tańda qaladaǵy qurban shalynatyn 7 oryndaǵy tazalyq pen tártip máselesi túgeldeı qolǵa alynyp, qasapshy azamattardy daıyndaý ázirlikteri júrgizilip keledi.

Buǵan qosa, Nur-Sultan ókildiginiń uıymdastyrýymen qaladaǵy qasapshy azamattar úshin «Qasapshylyq – saýapty hám jaýapty is» atty arnaıy semınar-trenıng uıymdastyrylyp, 50-den astam jan biliktilik jetildirgen. Keshe respýblıkalyq «Áziret Sultan» meshitinde bastaý alǵan bul tektes semınarlar Qurban aıt merekesi bastalǵanǵa deıin jalǵasatyn bolmaq.