Elorda bas ımamy bıylǵy oraza kezinde bolatyn ózgerister týraly aıtty

Nur-Sultan qalasynyń bas ımamy Erbolat Júsipov bıylǵy Ramazan aıynda bolatyn ózgerister jaıly málim etti, dep habarlaıdy elorda ákimdiginiń resmı saıty.

«Qurmetti qala turǵyndary men qonaqtary, barshańyzdy qasıetti Ramazan aıymen quttyqtaımyn! Sharıǵat úkimi men ǵylymı zertteý jumysynyń qorytyndysyna sáıkes bıyl Ramazan aıy 2 sáýirde bastalyp, 1 mamyrda aıaqtalady. Al 2 mamyr – Oraza aıt kúni bolady. Bıyl oraza 30 kúnge sozylady. 27 sáýirden 28-ine qaraǵan tún qasıetti Qadir túni bolmaq», - dedi bas ımam.

Ol óz sózinde QMDB-nyń qoldaýymen Orta Azııa elderiniń sharıǵat jáne pátýa salasy boıynsha arnaıy keńes qurylyp, ortaq máselelerdi ózara kelisip, sheshim qabyldanyp jatqanyn aıtyp ótti.

«Jalpy sharıǵat boıynsha balıǵat jasyna tolǵan, aqyl-esi durys árbir musylmanǵa Ramazan aıynda oraza ustaý paryz bolyp esepteledi. Al eger jolaýshy bolsa nemese densaýlyǵy jaramasa, ol adamǵa oraza ustamaýyna ruqsat beriledi», - dedi Erbolat Júsipov.

Sózin jalǵaı otyryp, sońǵy eki jylda pandemııaǵa baılanysty Ramazan aıynda taraýıh namazy oqylmaǵanyn aıta kele, bıyl qaladaǵy 12 meshitte quptan namazymen birge taraýıh ta oqylatynyn aıtyp ótti.

Brıfıng barysynda qalanyń Din isteri jónindegi basqarmasy basshysy N.Álmuhanov Nur-Sultan qalasynyń ákimdigi Qazaqstan musylmandary dinı basqarmasynyń qala boıynsha ókildigimen jáne tıisti memlekettik mekemelermen birlese daıyndyq jumystaryn júrgizip jatqanyn málim etti.

«Nur-Sultan qalasy ákimdigi tarapynan 2022 jyldyń 2 sáýiri men 1 mamyr aralyǵynda turǵyndardy túngi ýaqytta qoǵamdyq kóliktermen qamtamasyz etý maqsatynda elordanyń iri meshitterinen avtobýstar qatynaıtyn bolady, 01.00-ge deıin», - deıdi basqarma basshysy.

Avtobýstar myna meshitterdiń janynda qatynaıdy:
«Áziret Sultan» meshiti;
«Ábý Nasyr ál-Farabı» meshiti;
«Sadýaqas qajy Ǵylmanı» meshiti;
«Yryskeldi qajy» meshiti;
«Rahymqyzy Raısa ana» meshiti.