Elorda bas ımamy «Ál-Farabı» jamaǵatymen júzdesti (foto)

QMDB Astana qalasy ókildiginiń bas ımamy Erbolat Júsipov «Ábý Nasyr ál-Farabı» meshitine arnaıy kelip, jamaǵatpen júzdesti.

Besin namazyna jıylǵan jamaǵatpen júzdesken Bas ımam qasıetti Ramazan aıyndaǵy qulshylyq deńgeıiniń saqtalý joldary jóninde tushymdy nasıhat aıtty.

Nasıhat barysynda Erbolat Nuryldauly «ramazanshy» ǵana bolmaı, osy aıda qol jetkizgen qaırat pen jigerimizdi qalǵan ómirimizdi de Rabbymyzǵa qulshylyqta ótkizý úshin paıdalanýymyz kerektigin, Ramazannan keıingi aılarda da ımanymyzdy kúsheıtý – árbir musylmannyń muraty ekendigin tilge tıek etti.

Ramazan – Rabbymyz ben bizdiń aramyzdaǵy rııasyz qulshylyq ekenin aıtqan Bas ımam qaı ýaqytta, qaı jerde bolmasyn júregimizdiń árdaıym duǵada bolýyn aıtyp, ramazannan kelesi ramazanǵa aman-esen jetýimizdi tilep, duǵa jasady.