«El úlesi – páterge»: 3 otbasy baspanaly boldy (FOTO)

QMDB «Zeket» qaıyrymdylyq qorynyń Qyzylorda oblysy boıynsha ókildiginiń uıymdastyrýymen «El úlesi – páterge» aktsııasy aıasynda 3 qarmaqshylyq otbasy baspanaly boldy.
 
Saltanatty sharaǵa arnaıy qatysqan Syr óńirniń bas ımamy Bolatbek Ulasqanuly turmysy tómen otbasylarǵa №290, 291, 292 úılerdiń kiltin tabystaǵan soń, jańa qonystarymen quttyqtap kilem syılady.
 
Muqtajdyń muńyn oılap, meıirimdilikke úndeıtin berekeli jobanyń júzege asyrylýyna Qarmaqshy aýdanynyń 1972 jyly týǵan azamattary, «Josalynyń 100 jomart jigiti» aktsııasynyń qatysýshylary jáne jergilikti kásipkerler atsalysty.

Máýlit aıynda ótken mereıli sharada úıli bolǵan úsh otbasy da ıgi jobanyń basy-qasynda júrgen barsha demeýshi azamattarǵa jáne meshit ımamdary men jamaǵattaryna sheksiz rızashylyqtaryn jetkizdi.
 

Aıta keteıik, «El úlesi – páterge» jobasy aıasynda respýblıka boıynsha 292 úı berilse, onyń 30-y qyzylordalyq otbasylarǵa tartý etildi.