Bas prokýratýra: Jalǵan aqparat taratýǵa tyıym salynady
Bas prokýratýra azamattardy zańsyz áreketke barmaýǵa shaqyrady. Sońǵy kezde áleýmettik jelilerde jáne messendjerlerde kórineý jalǵan aqparattardy taratý jaǵdaılary kóbeıip ketti.
Atap aıtqanda, Arys qalasynda 350 turǵynnyń habar-osharsyz ketkeni jáne qaıtadan jarylystardyń bolýyna baılanysty ol jerde turýdyń qaýipti ekeni týraly jalǵan qaýeset te taraldy. Munyń ózi kópshiliktiń arasynda úreı týǵyzyp, Shymkent qalasynda zańsyz aktsııalardyń ótýine ıtermeledi. «Arys qalasyndaǵy jaǵdaıǵa qatysty teris aqparat faktileri boıynsha sotqa deıingi tergep-tekserý júrgizilýde.
Sonymen qatar, elimizdiń jańa ulttyq valıýta — «altynǵa» kóshetini, jınaǵan aqshany soǵan baılanysty dereý dollarǵa aıyrbastap, jyljymaıtyn múlikti satyp alý úshin jańa qaryzdardy resimdeý qajettigi týraly shyndyqqa saı kelmeıtin málimetterdi taratýshylar baıqalýda. Shyǵys Qazaqstan oblysyndaǵy jerlerdiń sheteldikterge satylǵany týraly shyndyqqa saı kelmeıtin ári arandatýshylyq aqparattardyń taraýy da azamattardy mazasyz kúıge túsirdi» delingen habarlamada.
Osy aıtylǵan mán-jaılardy eskere kele, quqyq buzýshylyqtardyń aldyn alý jáne qoǵamdyq qaýipsizdikti qamtamasyz etý maqsatynda «Prokýratýra týraly» Zańnyń 32-babyn basshylyqqa ala otyryp, Bas prokýratýra tómendegi jaǵdaılardy túsindiredi:
Memleket ár adamnyń aqparatty erkin alý ári taratý quqyǵyna kepildik beredi.
«Aqparatqa qol jetkizý týraly» Zańǵa saı, azamattar qajetti aqparatty alý úshin memlekettik organdarǵa júginýge quqyly.
Óz kezeginde, memlekettik organ qol jetkizýge shekteý qoıylǵan aqparattardan basqa suratylyp otyrǵan málimetterdi usynýǵa mindetti.
Memlekettik organdardan alǵan resmı aqparatty azamattar qandaı da bir shekteýsiz bólisýge quqyly.
Memleketke, qoǵam men adamnyń quqyqtaryna eleýli zııan keltiretin Ekstremıstik jáne kórineý jalǵan aqparat taratýǵa tyıym salynady.
Atap aıtqanda, qoǵamdyq tártipti buzatyn nemese azamattardyń, uıymdardyń, qoǵam men memlekettiń zańdy múddelerine eleýli zııan keltiretin osyndaı árbir fakt boıynsha Qylmystyq kodekstiń 274-baby boıynsha qylmystyq jaýapkershilik kózdelgen. Buqaralyq aqparat quraldaryn nemese telekommýnıkatsııa jelilerin paıdalana otyryp jasalǵan osyndaı áreketter úsh jylǵa deıin bas bostandyǵynan aıyrýǵa ákep soǵady. Jappaı tártipsizdikke arandatyp, azamattarǵa zorlyq-zombylyq jasaýǵa shaqyrǵany úshin Qylmystyq kodekstiń 272-baby boıynsha qylmystyq jaýapkershilik qaralǵan.
Osy aıtylǵan mán-jaılardy eskere otyryp, Bas prokýratýra azamattardy janjal týdyratyn jáne qoǵamdyq tártipti buzatyn zańsyz áreketterge barýdan, onyń ishinde jalǵan aqparat taratýdan tartynýǵa shaqyrady.
