Bas múftıge óńirdegi dinı ahýaldy baıandady (FOTO)

Búgin elordada Qazaqstan musylmandary dinı basqarmasynyń tóraǵasy Naýryzbaı qajy Taǵanuly Aqtóbe oblysynyń bas ımamy Tólebı Ospandy qabyldady.

Tólebı Dádiluly óńirdegi dinı ahýaldy Bas múftıge baıandap, ımamdardyń atqaryp jatqan jumystary týraly esep berdi.

«Oblystaǵy din qyzmetkerleriniń bilimin jetildirý maqsatynda oqytý kýrstaryn uıymdastyryp kelemiz. «Jeti rýhanı qazyq» qujaty halyqqa júıeli nasıhattalýda. Volonterlar jyly aıasynda jamaǵatty qaıyrymdylyq sharalaryna qatystyryp, ortaq maqsatqa jumyldyryp kelemiz» dep atap ótti Aqtóbe oblysynyń bas ımamy Tólebı Ospan.

T.Dádilulynyń esebin tyńdaǵan Bas múftı Naýryzbaı qajy Taǵanuly: «Imamdarymyz eldiń ıgiligi úshin qyzmet etýde belsendi bolý kerek. Ýaǵyz-nasıhat jumystary halyqtyń tanymy men talǵamyna saı júrgizilýi qajet. Osy máselege basty nazar aýdaryńyz. Sonymen qatar, jergilikti ımamdar arasynan ǵalymdar men ustazdardy shyǵaryp, halyq arasynda túsindirý sharalaryn júrgizińiz», – dedi.

Kezdesý barysynda Tólebı Ospan óńirde túsindirý sharalaryn jandandyrý úshin Respýblıkalyq aqparattyq-nasıhat tobynyń belsendi múshelerin Aqtóbege jiberý týraly ótinish-tilegin bildirdi. Bas múftı bul usynys oryndalatynyn jetkizdi.

Kezdesý sońynda QMDB Tóraǵasy bas ımamǵa naqty tapsyrmalar berdi.