Bas múftı jeti baǵyt boıynsha alǵashqy tórt aıdyń esebin tyńdady (FOTO)

Elordada Bas múftı Naýryzbaı qajy Taǵanulynyń tóraǵalyǵymen Qazaqstan musylmandary dinı basqarmasynyń kezekti Apparat jınalysy ótti. Kún tártibinde jeti baǵyt boıynsha 2021 jyldyń alǵashqy tórt aıynda atqarylǵan jumys esebi tyńdaldy.

Eske sala ketsek, jyl basynda Bas múftı Naýryzbaı qajy Taǵanuly din qyzmetkerlerine baǵdarlamalyq baıandamasyn joldaǵan bolatyn. Onda jeti baǵyt boıynsha jumystarǵa basymdyq beriletini aıtyldy. Olar – aqparat jáne qoǵammen baılanys, ýaǵyz-nasıhat, qaıyrymdylyq, oqý-aǵartý jáne kadrlyq áleýet, rýhanı tárbıe Ihsan ilimi, din men dástúr, jat dinı aǵymdarmen jumys.

Atalmysh jınalysta eń aldymen Aqparat jáne qoǵammen baılanys bóliminiń meńgerýshisi Marat Bektazınov qańtar-mamyr aılarynda aqparat taratý men qoǵammen baılanys baǵytyndaǵy jumystar jóninde esep berdi.

«Eseptik kezeńde www.muftyat.kz saıtyna 1872 materıal júkteldi. Atap aıtqanda 1242 jańalyq, 88 maqala, 236 vıdeo, 254 foto banner, 52 suraq-jaýap jarııalandy. Dinı basqarmaǵa qarasty Mýftııat jáne Hikmet TV Youtube arnasyna 358 vıdeomaterıal júkteldi. «Musylmannyń áleýmettik jelidegi ádebi» atty tálimdik qujat ázirlenip, Ǵulamalar keńesine usynyldy. Aqparattyq alańda «Jerleý rásimderin birizdendirý» jobasyn ilgeriletýdiń medıa jospary ázirlenip, jospar aıasynda respýblıkalyq basylymǵa eki maqala, respýblıkalyq eki radıohabar jáne oblystyq deńgeıde telearnalar men gazetterge suhbattar uıymdastyryldy.

Ýaǵyz-nasıhat bóliminiń meńgerýshisi Batyrjan Mansurov qańtar-sáýir aılarynda jalpy sany 6619 medıa ýaǵyz-nasıhat júrgizilip, 3 534 568 adam qamtylǵanyn atap ótti.

«Respýblıka kóleminde 164 704 qaıyrymdylyq is-shara ótip, 282 469 muqtaj otbasy kómek aldy» dedi esepti jıynda «Zeket jáne qaıyrymdylyq» qorynyń dırektory Talǵat Omarov.

Qańtar-sáýir aralyǵynda QMDB-ǵa qarasty din qyzmetkerleri 9 kitap daıyndap shyqty. Bul týraly apparat jınalysynda «Mýftııat» baspasynyń dırektory Murat Ábdihalyqov málimdedi.

«Osy aralyqta saıttarda, respýblıkalyq, oblystyq, aýdandyq gazetterde, ıhsan ilimine qatysty 820 maqala jazyldy. Áleýmettik jelilerde 1803 jazba-ınfografıka, 1845 ýaǵyz-dáris taspalanyp jelilerge salyndy. Sondaı-aq, onlaın, oflaın 552 is-shara (dóńgelek ústel, semınar, kezdesýler) ótti» dedi Murat Manapuly.

Dinı bilim jáne kadr daıarlaý bóliminiń meńgerýshisi Smaıyl Seıitbekovtiń aıtýynsha, bıylǵy jyldyń alǵashqy tórt aıynda respýblıka boıynsha 12985 adam saýat ashý kýrstaryna qatyssa, 4563 ımam biliktilikti arttyrý semınarlary men kýrstarynan ótken. Al «Din men dástúr» baǵyty boıynsha esep bergen Sharıǵat jáne pátýa bólimi meńgerýshisiniń orynbasary Hasan Amanqul el turǵyndarynan yrym-tyıymdarǵa qatysty suraqtardyń kóbeıgenin tilge tıek etti.

«Qańtar aıynda pátýa mamandary 6522 suraqqa jaýap berse, bul kórsetkish aı saıyn 2000-ǵa kóbeıip, sáýir aıynda 12642 suraqqa jaýap berildi. Saýaldardyń teń jartysy ǵıbadatqa qatysty bolsa, 27 paıyzy ártúrli taqyryptarda, ásirese, yrym-tyıymdarǵa, zamanaýı máselerge qatysty qoıylǵan» dedi Hasan Amanqul.

Jınalys sońynda Dinı ońaltý bóliminiń meńgerýshisi Qanat Alshynbaev jat dinı aǵymdarmen jumys baǵytyndaǵy atqarylǵan is-sharalary týraly esebin berdi. Óńirlerde atalǵan baǵytta destrýktıvti dinı aǵym ókilderimen núkteli jumys uıymdastyrylyp jatqanyn, sonymen qatar jat dinı ıdeologııalarynyń taralýyn aldyn alý boıynsha júrgizilgen sharalar jóninde, ásirese túzeý mekemelerinde de aýqymdy jumys atqarylyp jatqanyn aıtty.

Bas múftı jeti baǵyt boıynsha alǵashqy tórt aıda atqarylǵan jumystardyń esebin muqııat tyńdap, birqatar tapsyrmalar berdi.