Bas múftı jastarmen júzdesti (FOTO)

Astanada Qazaqstan musylmandary dinı basqarmasynyń tóraǵasy Serikbaı qajy Oraz Gýmanıtarlyq zań kolledjinde jastarmen kezdesti.

Bas múftı stýdentterge ómirlik maqsatty dál qoıý, jaman ádetten saq bolý, memleketshil patrıot tulǵa bolyp qalyptasý, ata-anany syılaý, elge qyzmet etý, ustazdy qurmetteý, ózgeni dinsizdikte aıyptamaý, qabiletti damytý, dástúrli qundylyqtardy joǵary qoıý, t.b. taqyryptar tóńireginde aqyl-keńesin aıtty.

«Kez kelgen eldiń ózindik qundylyqtary bar. Halyq sol qundylyqtardy árdaıym joǵary qoıady. Bizdiń halqymyzdyń qundylyqtary – ımandylyq, izettilik, birlik, toleranttylyq, t.b. Sizder jalyndaǵan jastyq shaqta kóptegen ıgilikterge qol jetkize alasyzdar. Jastyq – Allanyń bergen syıy. Sondyqtan, ardaqty paıǵambarymyz kárilik kelmeı turyp, jastyqtyń qadirin bilýge shaqyrǵan. Demek, jas adamnyń baǵyndyrar belesi kóp bolmaq. Oqýda ozat bop, tańdaǵan mamandyq boıynsha elge qyzmet etý – adamdyq isi», – dep atap ótti Bas múftı.

Serikbaı Satybaldyuly sharany uıymdastyrýǵa uıytqy bolǵan kolledj dırektory Saıat Nurlanulyna «Uly dala tósindegi Islam» atty kitabyn, al stýdentterge «Tápsir tunyǵy» eńbegin syıǵa tartty.

Kezdesý sońy suraq-jaýapqa ulasyp, stýdentter kókeıtesti saýaldaryna jaýap aldy.