Bas múftı ustazyna qurmet kórsetti (FOTO)

Búgin QMDB Tóraǵasy, Bas múftı Naýryzbaı qajy Taǵanuly Almatyǵa issapar aıasynda óziniń ulaǵatty ustazy, Dinı basqarmanyń tuńǵysh tizginin ustaǵan Rátbek qajy Nysanbaıulyna arnaıy baryp sálem berdi.

Rátbek qajy Nysanbaıuly shákirtin iltıpatpen qarsy aldy. Ekeýara kezdesý barysynda toqsanynshy jyldardaǵy elimizdegi Islam mektebiniń qaıta qalyptasý kezeńi, jańa myńjyldyqtaǵy ózgerister men búgingi bet beınesi áńgimege arqaý boldy.

«Eshteńe ońaılyqpen kelgen joq. Táýelsiz Qazaqstannyń ár jerinde jańa meshit ashýmen qatar, eldi dinı saýattandyrý jumystary da qıynǵa soqty. Biraq ımamdarymyz sol bir aýyr joldyń azabyn birge kóterdi. Ózińdi bilim alyp kelgen soń, shákirtim dep qabyldap qaımaǵy buzylmaǵan qalyń qazaqtyń arasyna jiberdim. Artqan úmitti aqtadyń. Endi mine, Allanyń qalaýymen bıikke jettiń. Osy qyzmette de abyroıly bol!» dep aǵynan jarylǵan Rátbek qajy Naýryzbaı qajy Taǵanulyna aq batasyn berdi.

Bas múftı usynysymen Dinı basqarma janynan qurylatyn Aqsaqaldar alqasyna Rátbek qajy da múshe bop qosylatynyn jetkizdi.

Kezdesý sońynda QMDB Tóraǵasy ustazyna qurmeti úshin alǵys aıtyp, qazaqtyń dástúrine saı syı-sııapat kórsetti. Rátbek qajynyń ıyǵyna shapan jaýyp, Dinı basqarmanyń 30 jyldyǵyna oraı daıyndalǵan kádesyı tartý etti.