BAS MÚFTI: Tatýlyqta bolý, sol tatýlyqqa sebepker bolý – barlyq nárseden qaıyrly
Qasıetti juma kúni Qazaqstan musylmandary dinı basqarmasynyń Tóraǵasy, Bas múftı Serikbaı qajy Satybaldyuly Astana qalasyndaǵy «Nur Astana» meshitinde «Tatýlyq pen birlik» taqyrybynda juma ýaǵyzyn júrgizdi.
Bas múftı bereke-birlikte bolýdyń mańyzyna toqtaldy:
«Biz – bıik maqsatymyzdy júzege asyrý ústindegi elmiz. Sonyń úshin eldiń amandyǵy, jurttyń tynyshtyǵy aıyryqsha mańyzdy. Paıǵambarymyz ǵalaıhısalam óz ósıetterinde momyn musylman ózine jaqsy kórgendi ózgege de laıyq kóretinin, súıispenshilik pen birlikte, yntymaqta ómir súrýdi maqsat etetinin jetkizgen. Sol bıik maqsatqa jetýdiń túpki mańyzy men máni tatýlyq pen birlikte. Al, Quran aıatynda:
لَّا خَيْرَ فِي كَثِيرٍ مِّن نَّجْوَاهُمْ إِلَّا مَنْ أَمَرَ بِصَدَقَةٍ أَوْ مَعْرُوفٍ أَوْ إِصْلَاحٍ بَيْنَ النَّاسِ ۚ وَمَن يَفْعَلْ ذَٰلِكَ ابْتِغَاءَ مَرْضَاتِ اللَّهِ فَسَوْفَ نُؤْتِيهِ أَجْرًا عَظِيمًا
Iaǵnı, «Alla Taǵala bul aıatta pendelerine «Ózara kúńkilderiniń kóbinde qaıyr joq. Biraq, kim bir sadaqany ne bir ıgilikti nemese adamdardyń arasyn jarastyrýdy ámir etse, ol qaıyrly. Jáne bireý, osyny Allanyń rızalyǵyn izdep istese, sonda oǵan jedel iri saýap beremiz», - deıdi.
Iaǵnı, pendeshilik qylyp kisiniń artynan ǵaıbat aıtyp, túkke tatymaıtyn kıkiljińder úshin ókpe-nazǵa berilip, ashýǵa baryp jatatyn jaǵdaılar bolady. Bulardyń eshqaısysynda qaıyr joq. Qaıyr nede bar? Aıat boıynsha;
Birinshi, sadaqada qaıyr bar. Sadaqa degen qoldaǵy aqshany bireýdiń qolyna ustata salý emes. Qaıta, shynaıy, júrekten, kóńilden yqylaspen bolǵan dúnıe. Jol kórsetseńiz de, jyly sóz aıtsańyz da, adamǵa qol ushyn bergen ár isińiz sadaqa bop sanalady.
Ekinshisi, bireýdi týra jolǵa bastaýda qaıyr bar. Iaǵnı, jora-joldastaryńyzdan, jaqyndaryńyzdan bir qatelikter ketip jatsa, sony túzetseńiz, jaqsy men jamannyń arajigin ajyratyp aıtqan bolsańyz, sol iste kóp jaqsylyq bolmaq.
Úshinshi, adamdardy ózara tatýlastyryp, birlikke, yntymaqqa shaqyrýda qaıyr bar.
Demek, adamdar arasynda janashyrlyq pen qamqorlyqta, izgilik pen bereke-birlikte, tatýlyqta bolý, sol tatýlyqqa sebepker bolý – barlyq nárseden qaıyrly. Alla Taǵala mundaı isterdiń saýabyn «biz jedeldetip, jyldam, tez, sheksiz etip beremiz»,- deıdi».
Osylaısha, Bas múftı Serikbaı qajy Satybaldyuly meshitke kelgen elordalyq jamaǵatqa musylmandardyń asyl qasıeti bolǵan bereke-birliktiń máni men mańyzyn jetkizip, namaz sońynda eldiń amandyǵy, jurttyń tynyshtyǵy úshin duǵa jasady.
