BAS MÚFTI TARAÝYQ NAMAZYNDA ÝAǴYZ AITTY (FOTO)

Qazaqstan musylmandary dinı basqarmasy tóraǵasy Naýryzbaı qajy Taǵanuly Astanadaǵy «Sádýaqas qajy Ǵylmanı» meshitinde taraýyq namazyna qatysyp, jamaǵatqa ýaǵyz aıtty.

Bas múftı meshitke kelýshilerge Ramazanda Quran Kárim oqýdyń artyqshylyǵy jóninde baıandady.

«Ábý Zárr (Alla oǵan razy bolsyn): «Men Alla Elshisine (oǵan Allanyń salaýaty men sálemi bolsyn) ósıet aıtyńyz», – dedim. Sonda ol kisi: «Saǵan taqýalyqty ósıet etemin. Sebebi, taqýalyq – árbir nárseniń bastaýy»,– dedi. Men: «Ýa, Allanyń Elshisi! Maǵan taǵy ósıet aıtyńyz», – dedim. Ardaqty Paıǵambarymyz (oǵan Allanyń salaýaty men sálemi bolsyn): «Saǵan Quran oqýdy ósıet etemin. Rasynda ol saǵan jer betinde jol kórsetýshi nur ári aqyretiń úshin azyq bolady», – dedi.

Bul hadıste de ardaqty Paıǵambarymyzdyń (oǵan Allanyń salaýaty men sálemi bolsyn) taqýalyqtan keıin Quran oqýdy ósıet etýinde osyndaı mán-maǵyna bar. Ardaqty Paıǵambarymyzdyń ózi (oǵan Allanyń salaýaty men sálemi bolsyn) qasıetti Ramazan aıynda Quran oqýǵa erekshe den qoıatyn. Ibn Abbas (Alla oǵan razy bolsyn): «Ramazan kezinde Jebireıil perishte ardaqty Paıǵambarymyzben (oǵan Allanyń salaýaty men sálemi bolsyn) ár túni kezdesip Quran oqyp tekseretin», – degen (ımam Buharı, Múslım).

Osy jáıttardy negizge alǵan Islam ǵulamalary qasıetti Ramazan aıynda Qurandy tolyqtaı bir márte ne odan kóp ret hatym etýdiń mustahab amal ekenin aıtqan» dedi QMDB Tóraǵasy.

Sondaı-aq Bas múftı Naýryzbaı qajy Taǵanuly jamaǵatpen birge taraýyq namazyn oqyp, el men jerdiń tynyshtyǵy úshin duǵa jasady. 

​