BAS MÚFTI ShYMKENTTE JAŃA MEShITTIŃ AShYLÝYNA QATYSTY (FOTO)
Búgin Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanuly Shymkent qalasynda jańadan boı kótergen «Turdynııaz ata» meshittiń ashylýyna qatysty.
Igi shara qasıetti Quran aıattaryn oqýmen bastalyp, Bas múftı el amandyǵy men tynyshtyǵy úshin duǵa jasady. Budan keıin quttyqaý sóz alǵan Naýryzbaı qajy Taǵanuly:
«Táýelsizdik – jalpy dúnıede teńdesi joq tátti sóz. Biraq onyń ońaılyqpen kelmegeni túsinikti. Táýelsizdiktiń arqasynda elimizde meshitter qaıta boı kóterip, dinimiz men dástúrimiz oraldy. Salt-sanamyz qaıta jańǵyrdy. Meshit salýdyń dinimizde saýaby orasan. Qaltasynda qarjysy bar adam emes, Allanyń qalaýymen meshit salý buıyrady eken. Sondyqtan osynda meshit sala almadym degen oı mazalaǵan jandar bolsa, Alla Taǵala osyndaı meshit salýdyń saýabyn sizderge de násip etsin. Ózderińiz bilesizder, meshittiń atqaratyn qyzmeti, qoǵamdaǵy orny óte úlken. Meshit – rýhanııat ordasy, oqý-bilimniń ortalyǵy. Sebebi meshitterimiz tek qulshylyq jasaıtyn oryn ǵana emes. Meshit – dinı saýat ashatyn, sábılerge azan shaqyryp at qoıatyn, jańadan otaý qurǵan jas jubaılardyń aq nekesin qııatyn, dúnıeden ótken aıaýly jandarǵa Quran oqytyp, duǵa baǵyshtaıtyn, muqtaj jandarǵa qaıyrymdylyq jasalatyn, qınalǵan adamdarǵa rýhanı qoldaý kórsetetin meıirim mekeni. Endeshe, búgin el ıgiligine berilip otyrǵan osy meshittiń de ishi jamaǵatqa tolyp, din Islamǵa laıyqty qyzmet etýin tileımin!», - dedi.
Sondaı-aq, QMDB Tóraǵasy saltanatty shara barysynda qulshylyq úıiniń boı kóterýine atsalysqan Ahmedjan Turdynııazov áýletine alǵys aıtyp, rızashylyǵyn bildirdi.
