Bas múftı shymkentte tarıhı meshitterdi aralady (foto)

Qazaqstan musylmandary dinı basqarmasynyń tóraǵasy Serikbaı qajy Oraz Túrkistan oblysynda ornalasqan tarıhı kóne meshitterdi aralap, din qyzmetkerleriniń jumysymen tanysty.

QMDB Tóraǵasy Serikbaı Satybaldyuly ımam-moldalarǵa múftııat qabyldaǵan meshittiń ishki tártip erejesin saqtaýdy, qadaǵalaýdy tapsyrdy. Sonymen qatar, meshitke kelýshi jamaǵatty árdaıym birlik pen izgilikke úndep, ımandylyqqa uıytý qajettigin atap ótti.

Serikbaı qajy Orazdyń aıtýynsha, kóne meshitterdiń tarıhymen tanysýǵa nıet bildirgen azamattarǵa sáıkesinshe tolyqqandy aqparat berilý kerek. Bas múftı bul baǵytta kásibı tarıhshy mamandardy qyzmetke jumyldyrý máselesin sóz etti.

«Túrkistan – tarıh pen dástúrge baı ólke. Sonaý yqylym zamannan boı kótergen tarıhı meshitter men rýhanı jádigerler – halqymyzdyń sarqylmas qazynasy. Rýhanı qazynamyzdy keler urpaqqa nasıhattap, jetkizý – barshamyzdyń asyl mindetimiz. Osy baǵytta belsendi qyzmet etýimiz kerek»,  – dep atap ótti Serikbaı qajy Satybaldyuly.

Kezdesý sońynda Bas múftı óńirdegi din qyzmetkerlerine naqty tapsyrmalar berdi.