Bas múftı «S.Ǵylmanı» meshitiniń jamaǵatymen júzdesti (FOTO)

Qazaqstan musylmandary dinı basqarmasynyń tóraǵasy, Bas múftı Serikbaı qajy Satybaldyuly Elordadaǵy «Sádýaqas qajy Ǵylmanı» meshitiniń jamaǵatymen kezdesip, urpaq tárbıesi jaıly juma ýaǵyzyn júrgizdi.

«Urpaq tárbıesi – bolashaq tiregi» taqyrybynda ýaǵyz aıtqan Bas múftı:

«Balalardy súıispenshilikpen tárbıelep, mahabbat nuryn jaýdyrý ár ata-ananyń mindeti. Bul turǵydaǵy úlken ıdealymyz – Paıǵambarymyz ﷺ. Ol birde balalaryn emirenip súımeıtinin aıtqan bádáýıge:  «Alla Taǵala júregińdegi meıirimińdi alyp qoıǵan bolsa, men ne isteıin endi?» – dep renish bildirgen. Sebebi meıirimdilikpen ósken bala da meıirimdi bolady. Meıirimdilik júrekti jibitip, jumsaqtyǵyn joǵaltpaýyn qamtamasyz etse, qatygezdik pen salqyndyq, kerisinshe, júrekti qataıtady.  Ádepti bolý, qaı kezde de tekti tárbıeniń jemisin kórsetý degen sóz. Mine, mundaı urpaq, Abaısha aıtsaq, ata-ananyń kóz qýanyshy, qyzyǵy men súıinishi», - dep atap ótti.

Sondaı aq, Bas múftı qalalyq «Sádýaqas qajy Ǵylmanı» meshitiniń tynys-tirshiligimen tanysyp, jańa taǵaıyndalǵan bas ımam Nurlan Rmazanovqa meshit jumysyn jandandyra túsýdi tapcyra kele, qyzmetine tabys tiledi.