Bas múftı: Oraza aıt qutty bolsyn! (VIDEO)
Serikbaı qajy ORAZ,
Qazaqstan musylmandary dinı basqarmasynyń tóraǵasy, Bas múftı
Qadirli otandastar, qurmetti baýyrlar!
Barshańyzdy kúlli musylman úmbetiniń ulyq merekesi – oraza aıtpen quttyqtaımyn. Ár otbasyna baq pen bereke, birlik pen ıgilik tileımin. Alla Taǵala otyz kún tutqan orazamyzdy, jasaǵan qulshylyq-ǵıbadatymyzdy, bergen sadaqymyzdy, barsha ıgi ımalymyzdy qabyl etip, mol saýaptan jazǵaı!
Jaratýshy Jabbar Iemiz: «Pendelerim Men paryz etken orazany atqaryp, aqysyn alýǵa (aıt namazyn óteýge) meshitke bet aldy. Olar Men úshin oraza ustady, Meniń pármenimmen aýyz ashty, endi qýanyshqa kenelsin...» – dep súıinshi habar jetkizgen.
«Aıt» sózi – «merekeleý», «hal surasý», «bir-birin qýantý», «qýanyshqa toptalý», «qarymta» degen maǵynalardy bildiredi. Alla Taǵala barsha otbasyna bereketin jaýdyryp, qasıetti ramazan aıynda yjdahattylyqpen aýyz bekitken jamaǵattyń qýanyshyn arttyrǵaı!
Oraza aıt – otbasylyq mereke. Meıram kúni ata-anamyzǵa, kishkentaı búldirshinderge, aǵaıyn-týystarǵa syılyq úlestirip, olardy qýanyshqa bóleý – merekeniń sánin arttyra túsetin ıgi is. Jabyrqaǵan jandy demep, qarııalardy qýanyshqa bólep, kómekke muqtaj adamnyń alǵysy men batasyn alý – ol da saýapty amaldyń biri.
Aıt kúninde tolyq jýynyp, jupar ıis sebinip, jamaǵatpen aıt namazyna qatysýdyń saýaby erekshe. Namazǵa barýdan buryn qurmadan dám tatý – paıǵambarymyz Muhammedtiń (oǵan Allanyń salaýaty men sálemi bolsyn) súnnet amaly.
Qurmetti qaýym!
Ramazan aıynda meshitterimizde aýyzashar berilip, qaıyrymdylyq is-sharalar júzege asty. Kópbalaly otbasylar men kómekke muqtaj jandarǵa qaıyrymdylyq jasaldy. Osynaý ıgi iske úles qosqan barsha jomart jandarǵa alǵys aıtyp, Alla razy bolsyn deımin.
Oraza aıt merekesi qutty bolsyn! Alla Taǵala duǵa-tilegimizdi, qasıetti aıda jasaǵan qaıyrly amalymyzdy, bergen zeket pen pitir sadaqamyzdy qabyl etkeı!
Árbir otbasyna amandyq, jaqsylyq tileımin. Rabbymyz ramazannan ramazanǵa deıin aıdan aman, jyldan esen jetkize bergeı! Elimiz aman, jurtymyz tynysh bolǵaı! Áýmın!
