Bas múftı Mysyrda ál-Farabı murasyna arnalǵan konferentsııada baıandama jasady (FOTO)

Mysyr Arab Respýblıkasynyń astanasy Kaır shaharynda «Ekinshi ustaz Ábý Nasyr ál-Farabıdiń Islam órkenıetine qosqan úlesi» taqyrybynda halyqaralyq konferentsııa ótti. Igi basqosý qos eldiń memlekettik ánuranymen ashyldy.

Konferentsııada baıandama jasaǵan Bas múftı Naýryzbaı qajy Taǵanuly: «Barshańyzǵa Ábý Nasyr ál-Farabıdiń týǵan ólkesi, baýyrlas Qazaqstan halqynyń duǵaı sálemin joldaımyn. Ótken jyly bizdiń elde Otyrar oıshyldarynyń eń ataqtysy, eń máshhúri – Arıstotelden keıingi «ekinshi ustaz», «Shyǵystyń Arıstoteli» atanǵan uly ǵulama Ábý Nasyr ál-Farabı týraly zertteý jumystary júzege asty. Bul baǵyttaǵy jumystar áli de jalǵasyn tabýda. Osy rette men myna máselege aıryqsha toqtalǵym keledi. Ál-Farabıdiń kózqarasy boıynsha, qarym-qatynas pen basqarý isindegi eń basty másele – aqıqatqa jetý, qaıyrymdylyq pen ıgi amal jasaý t.b. Bul – yqylasty adamnyń ǵana qolynan keletin is. Sebebi ǵulama babamyz aıtqandaı, júregi keń, oqyǵany men toqyǵany teń adam danalyq pen qaıyrymdylyq úshin ómir súredi. Alla Taǵala barshamyzǵa jaqsy ómir súrýdi násip etkeı. Ámın!» dedi.

Konferentsııa jumysyna qatysqan Qazaqstannyń Mysyr Arab Respýblıkasyndaǵy Tótenshe jáne Ókiletti elshisi Qaırat Lama Sharıf quttyqtaý sózin jetkizdi. Ál-Farabı atyndaǵy Qazaq ulttyq ýnıversıtetiniń rektory Janseıit Túımebaev beınequttyqtaý joldady.

Konferentsııada belgili ǵalym, farabıtanýshy, akademık Ábsattar qajy Derbisáli jáne ál-Azhar ýnıversıtetiniń oqytýshylary ǵulama murasy jaıly baıandama jasady.

​