BAS MÚFTI MEShIT JAMAǴATYNA JUMA ÝAǴYZYN AITTY (FOTO)
Búgin, qasıetti juma kúni «Ábý Nasyr ál-Farabı» meshitinde Qazaqstan musylmandary dinı basqarmasynyń Tóraǵasy, Bas múftı Naýryzbaı qajy Taǵanuly jamaǵatpen júzdesti. QMDB Tóraǵasy «Musylmannyń kelbeti qandaı bolý kerek?» taqyrybynda jamaǵatqa juma ýaǵyzyn aıtty.
«Musylman adam Jaratýshynyń aldynda mindetti bolǵan qulshylyq-ǵıbattaryn oryndaýmen qatar, kúndelikti ómirde júris turysynda, kelbetinde asyl dinimiz talap etetin izgi sıpattarǵa saı bolýy qajet. Qasıetti Quranda Alla Taǵala ıman etken jandardy túrli izgi sıpattarmen sıpattaǵan. Mysalǵa, qasıetti Qurandaǵy «Álı Imran» súresiniń 133-134-aıattarynda Alla Taǵala: «Rabbylaryńnyń jarylqaýy men keńdigi jer men kókteı jánnatyna jarysyńdar. (Bular) taqýalar úshin ázirlengen. Olar – (taqýalar) keńshilikte de, tarshylyqta da Alla jolynda mal sarp qylǵandar. Sondaı-aq ashýlaryn jutýshylar, adamdardy keshirim etýshiler. Alla ıgilik isteýshilerdi jaqsy kóredi», – degen. Bul aıattarda Alla Taǵala múmınderge Onyń jarylqaýy men jánnaty taqýalar úshin ázirlengenin baıandap, keıin múmınniń kelbetine tán sıpattardy baıandap, olar tarshylyqta da, barshylyqta da qolynda barymen ózgelerge járdem beretinin, ashýlaryn ustaı alyp, ózgeniń kemshiligine keshirimmen qaraıtynyn aıtqan», - dedi Bas múftı.
Sondaı-aq Naýryzbaı qajy Taǵanuly ardaqty Paıǵambarymyzdyń (oǵan Allanyń salaýaty men sálemi bolsyn) meıirim men raqymǵa toly ómirinen, kórkem minezi men izgi qasıetterinen mysaldar keltirip, onyń árbir sózi men isi meıirimdiliktiń aıasynda órbigenin tilge tıek etti. «Musylman adam – din talaptaryna bekem, júregi taza, ózgelerge janashyr, dana da bilimdi, qoǵamǵa paıda keltirýge talpynatyn, dúnıelik isteri men men aqyrettik amaldaryn qatar alyp júretin tulǵa bolýy qajet. Eń bastysy árbir izgi amalyn shynaıy yqylaspen, bir Allanyń razylyǵyna bólensem degen nıette oryndap, kózboıaýshylyq pen jasandylyqtan saqtanýy tıis.
Ardaqty Paıǵambarymyz (oǵan Allanyń salaýaty men sálemi bolsyn): «Rasynda Alla Taǵala shynaıy yqylaspen tek qana Onyń ǵana rızashylyǵyn qalap jasalǵan amaldan basqasyn qabyl etpeıdi», – degen» dedi Bas múftı. Nasıhat sońynda QMDB Tóraǵasy jamaǵatty Paıǵambarǵa (oǵan Allanyń salaýaty men sálemi bolsyn) laıyqty úmbet bolýǵa shaqyryp, elimiz ben jerimizdiń tynyshtyǵyn tilep, jamaǵatpen birge duǵa jasady.
Derekkóz: ummet.kz
