BAS MÚFTI MARQUMDARDYŃ RÝHYNA QURAN HATYM DUǴASYN BAǴYShTADY (FOTO+VIDEO)

Búgin elimizde jarııalanǵan Jalpyulttyq aza tutý kúnine oraı QMDB tóraǵasy, Bas múftı Naýryzbaı qajy Taǵanulynyń bastamasymen barlyq meshitterde Quran hatym duǵasy jasaldy. Saýapty sharaǵa elimizdiń barlyq óńirlerindegi qulshylyq ordalary birige ún qosyp, búgin bir mezette qaıǵyly oqıǵada qaza tapqandardyń rýhyna Quran baǵyshtaldy.

Elorda tórindegi respýblıkalyq «Áziret Sultan» meshitinde Bas múftı Naýryzbaı qajy Taǵanuly bastaǵan din qyzmetkerleri Quran hatym duǵasyna qatysyp, Otan qorǵaý jolynda opat bolǵan sarbazdarymyz ben beıbit turǵyndardyń rýhyna Quran baǵyshtady. Memleketimizdiń Kókbaıraǵy tómen túsirilip, kúlli Qazaqstan halqy qaıǵyǵa shomǵan azaly kúnde marqumdardardyń artynda qalǵan týystary men jaqyndaryna kórkem sabyr surap, Jaratýshy Alladan jaqsylyq tiledi.

Saýapty sharadan soń tilshiler qaýymyna bergen suhbatynda Bas múftı: «Biz ótken jeltoqsan aıynda 2022 jyldyń jumys josparyn bekitip, «1 kúnde – 1 Quran hatym» jobasyn qolǵa alǵan bolatynbyz. Maqsatymyz – kún saıyn Qurandy tolyq oqyp, elimizdiń erteńi úshin qurban bolǵan babalarymyzdyń rýhyna baǵyshtaý. Búgin Jalpyulttyq aza tutý kúninde Otan úshin janyn bergen azamattarymyzdyń rýhyna arnaıy Quran hatym duǵasyn baǵyshtadyq. Alla qabyl etsin!

Oqıǵa kezinde oqqa ushqan beıbit turǵyndardy Alla meıirimine alǵaı. Jaratýshy Iemiz jaraqat alǵan jandardyń tez arada saýyǵyp ketýin tileımiz.

Qıyn sátte ár azamat birligin tanytyp, óz tarapynan qoldaý kórsetýde. Biz, din qyzmetkerleri de kún saıyn duǵa jasaýdamyz», – dep atap ótti.