BAS MÚFTI I HALYQARALYQ DÓŃGELEK ÚSTEL JUMYSYNA QATYSTY (FOTO)
Búgin elordada Túrki memleketteri múftıler alqasy janyndaǵy Pátýa keńesiniń «Túrki álemi: Pátýa berýdiń ádisnamasy men ereksheligi» I halyqaralyq dóńgelek ústel jumysy bastaldy.
Qazaqstan, Túrkııa, Ázerbaıjan, Qyrǵyzstan men Ózbekstan memleketteriniń pátýa mamandary bas qosqan jıynnyń ashylýyna QMDB Tóraǵasy, Bas múftı Naýryzbaı qajy Taǵanuly arnaıy qatysty.
«Bizdiń aramyzdy eldiń shekarasy nemese teńiz bólgenimen, tarıhı sabaqtastyq árqashan saqtalyp kelgen. Túrki halyqtarynyń nanym-senimi, tildik negizi, salt-dástúri, tipti tarıhymyz ben rýhanııatymyz da ortaq. Ózderińiz jaqsy bilesizder, Túrki memleketteri múftııattarymen birlese otyryp, dinı merekelerdi, atap aıtqanda Ramazan aıynyń bastalýy men oraza aıttyń birdeı atalyp ótýine arnalǵan arnaıy keńes quryldy. Aı qaraýǵa baılanysty erejeler qabyldanyp, keńes jumysy turaqty túrde júzege asyp keledi. Pátýa ázirleý barysynda Hanafı mázhabynyń kózqarasy, qajettilik jaǵdaıda basqa mázhab ıeleriniń pikiri eskeriledi. Sonymen qatar, jergilikti halyqtyń dástúrleri, ǵuryptary, sondaı-aq sheteldik pátýa komıtetteri men ıslam fıqhy uıymdarynyń tájirıbeleri nazardan tys qalmaıdy.
Osy rette basa aıtqym keletin másele: túrki memleketteriniń din salasyndaǵy yntymaqtastyǵyn arttyrý úshin keıbir máselelerge ortaq pátýalar shyǵarý óte mańyzdy. Bul, ásirese, jastar arasynda dinniń durys nasıhattalýyn qamtamasyz etýge, sonymen qatar qoǵamdaǵy dinge qatysty ártúrli pikirtalastardy sheshýge kómektesedi. Pátýa shyǵarýda jergilikti dástúrlerdi nazarǵa alý da mańyzdy, óıtkeni bul din men mádenıettiń úndestigin saqtaýǵa, qoǵamdaǵy kelisimdi nyǵaıtýǵa yqpal etedi» dedi Bas múftı.
Sondaı-aq QMDB Tóraǵasy dinı oqý-aǵartý salasyna, ózekti máselelerge qatysty ortaq pátýa shyǵarýǵa jáne dinı ádebıetterdi birlesip daıyndaýǵa qatysty usynystaryn jetkizdi.
