Bas múftı «Ǵylmanı» meshitiniń jamaǵatymen júzdesti (FOTO)

Qazaqstan musylmandary dinı basqarmasynyń tóraǵasy, Bas múftı Narýyzbaı qajy Taǵanuly búgin Nur-Sultan qalasyndaǵy «Sádýaqas qajy Ǵylmanı» meshitin zııarat jasap, jergilikti jamaǵatpen júzdesti.

Bas múftı besinge jınalǵan jamaǵatty qasıetti Ramazan aıymen quttyqtap, ulyq aıdyń qadir-qasıeti, sońǵy onkúndiktiń mańyzy jaıyndaǵy oı-tolǵamdarymen bólisip, «Ramazan – múmkinshilik aıy» degen taqyrypta nasıhat aıtty.

«Ramazan – keremet jetistikke jetip, kúnádan keshiriletin, múminder úshin múmkinshilikterge toly aı. Qasıetti Quranda jánnatqa baratyn musylmandardyń taqýalyq, sabyrlyq sııaqty sıpattary baıandalǵan. Taqýalyqqa jetýdiń joldary kóp. Sonyń biri – Ramazan aıynyń orazasyn ustaý arqyly taqýalyqqa jetýge bolady. Sabyrlyqqa boı úıretýdiń de joldary alýan túrli. Qasıetti aıda oraza ustaý, kúni boıy tamaqtan, nápsi qalaýynan bas tartý arqyly adam balasy sabyrlyqty úırene alady. Mine, Ramazan – musylmandar úshin úlken tárbıe mektebi», - dedi Bas múftı.

Sonymen birge, QMDB tóraǵasy jamaǵattyń bereke-birligi, alda kele jatqan Qadyr túniniń mańyzy jaıly da baıandap berdi.