Bas múftı esil erlerdi aqtyq saparǵa shyǵaryp saldy (FOTO)
Keshe Taldyqorǵan qalasyI.Jansúgirov atyndaǵy Mádenıet saraıynyń aldynda Qazaqstan Respýblıkasy Qorǵanys mınıstrliginiń MI-8 tikushaǵynda áskerı mindetin oryndaý barysynda qaıtys bolǵan taldyqorǵandyq jaýyngerlermen qoshtasý rásimi ótti.
Qoshtasý rásimine QR Qorǵanys mınıstri Nurlan Ermekbaev, Almaty oblysynyń ákimi Amandyq Batalov, Qazaqstan musylmandary dinı basqarmasynyń tóraǵasy Serikbaı qajy Oraz qatysty.
Bas múftı qaza bolǵan marqumdardyń otbasyna kóńil aıtyp, olardy kórkem sabyrǵa shaqyrdy.
Esterińizge sala ketsek, áskerı mindetin atqarý barysynda qaıtys bolǵan áskerı jaýyngerlerdiń beseýi Taldyqorǵan qalasynan bolatyn. Búgin bes jaýyngerdiń ekeýi, ıaǵnı efreıtor Aıdyn Əbildınov pen efreıtor Mıras Jumataevtyń deneleri jer qoınaýyna tapsyryldy.
Al, 29-naýryz, qasıetti juma kúni Elorda meshitterinde juma namazynan keıin Otan úshin qaza bolǵandardyń rýhyna arnap arnaıy Quran aıaty baǵyshtalyp, duǵa jasaldy.
Eske salsaq, Serikbaı qajy Oraz Qyzylorda oblysynyń aýmaǵynda áskerı tik ushaqtyń apatqa ushyrap, 13 jaýyngerdiń qaza bolýyna baılanysty kóńil aıtqan bolatyn.
"Memleketimizdiń tynyshtyǵy men elimizdiń amandyǵy jolynda boryshyn ótep júrgen jas jaýyngerlerdiń qazasy týraly qaraly habar bizdiń de janymyzǵa qatty batty. Paıǵambarymyz (oǵan Allanyń salaýaty men sálemi bolsyn) bir ósıetinde: «Otanyn kúzetken shekarashynyń kózi aqyrette kúımeıdi», - degen. Ata-babalarymyz mura etip qaldyrǵan Otannyń azattyǵy men tynyshtyǵyn qorǵaý - óshpeıtin ónege, úzilmeıtin izgi amal. Ózimniń jáne Qazaqstan musylmandary dinı basqarmasy atynan marqumdardyń ata-anasyna, týǵan-týystaryna qaıǵyra kóńil aıtyp, sabyr tileımin. Alla Taǵala qazanyń artyn qaıyrly etip, Jaratýshy Iemiz óz meıirimine bólesin!» - delingen Bas múftıdiń kóńil aıtý jedelhatynda.
