BAS MÚFTI «BÓLIM SAǴATYN» ÓTKIZDI (FOTO)
Qazaqstan musylmandary dinı basqarmasynyń tóraǵasy Naýryzbaı qajy Taǵanulynyń tóraǵalyǵymen «Bólim saǵaty» jobasy boıynsha kezekti Apparat jınalysy ótti.
Jıynda Qazaqstan musylmandary dinı basqarmasyna qarasty «Zeket jáne qaıyrymdylyq» qorynyń jumys esebi tyńdaldy. Qor dırektory Maqsatbek Qaıyrǵalıev Bas múftı bastamasymen júzege asqan «Qıyndyqta el birge» aktsııasy aıasynda atqarylǵan is-sharalar jaıly baıandady.
Jınalys barysynda Bas múftı Naýryzbaı qajy Taǵanuly: «Zeket jáne qaıyrymdylyq» qorynyń halyqqa qyzmet etý jolyndaǵy mańyzdy baǵyttarymyzdyń biri ekeni daýsyz. Sol sebepti bul saladaǵy jumystardy tııanaqty oryndaý qajet. Ásirese el basyna kún týǵan qıyn-qystaý kezeńderde qorǵa qarasty eriktiler toby, din qyzmetkerleriniń eńbegi erekshe» dep atap ótti.
«Zeket jáne qaıyrymdylyq» qorynyń dırektory Maqsatbek Maqsotulynyń aıtýynsha, «Qıyndyqta el birge» aktsııasy aıasynda Bas múftı Naýryzbaı qajy Taǵanulynyń tapsyrmasymen Dinı basqarma qyzmetkerleri aýqymdy qaıyrymdylyq is-sharalardy atqarýda.
«Osy rette «Zeket jáne qaıyrymdylyq» qorynyń «Sý tasqynynan zardap shekkenderge shuǵyl kómek» qaıyrymdylyq jobasy boıynsha respýblıka kóleminde keń aýqymda materıaldyq jáne qarjylaı kómek kórsetildi. Atap aıtqanda búgingi kúnge deıin apattan zardap shekken Aqtóbe, Atyraý, BQO, Qostanaı, SQO oblystaryna 150 gazel, 84 fýra, 2 kamaz, 15 alfard, 8 Evakýator, 1 poezd vagony (102 tonna un, 516 tonna jarma (kúrish, grechka, makaron, qant), 148 tonna (kúnbaǵys maıy), 12 303 tósenish, 470 776 turmystyq zat, 3 778 rezenke etik, 334 782 qural-saıman jetkizildi.
Sonymen qatar 25 qaıyq, 3 qaıyq motory, 5 dızeldi generator, 3 baspana, 2 qajylyq sertıfıkaty tabystaldy. Sondaı-aq, 9 940 adamǵa kúndelikti ystyq tamaqtar ázirlenip, atalǵan oblystar boıynsha jalpy sany meshit ımamdary men jamaǵatynan quralǵan 2060 «qaıyrymdylyq jarshylary» eriktileri jumyldyryldy» dedi qor dırektory.
Jıynda QMDB basshylyq quram men bólim meńgerýshileri qor jumysyn odan ári jetildirý boıynsha óz oılary men pikirlerin ortaǵa saldy.
