Bas múftı Birikken arab ámirlikteri elshisimen suhbattasty (FOTO)
Qazaqstan musylmandary dinı basqarmasynyń tóraǵasy Serikbaı qajy Oraz Astanada Birikken Arab Ámirlikteriniń Tótenshe jáne Ókiletti Elshisi Muhammed Ahmed Sultan Isa ál-Jabermen kezdesti.
Resmı kezdesýde Bas múftı men Elshi eki eldiń rýhanı-mádenı saladaǵy áriptestik qarym-qatynasy, Astanada ár 3 jyl saıyn ótetin Álemdik jáne dástúrli din kóshbasshylarynyń kezekti sezi, jahandyq dinı ahýal, musylman úmbetiniń birligin nyǵaıtý, t.b. máseleler jóninde pikir alysty. Muhammed Ahmed Sultan Isa ál-Jaber elimizdiń rýhanı-mádenı saladaǵy bastamalary jaıly oń pikirin bildirdi.
Bas múftı Serikbaı qajy Satybaldyuly óz kezeginde múftııattyń uıymdastyrýymen ótken Eýrazııa musylman ǵulamalarynyń birinshi forýmy jaıly baıandap, atalǵan halyqaralyq basqosýdyń mán-mańyzyna toqtaldy.
Kezdesý sońynda QMDB Tóraǵasy Elshige «Uly dala tósindegi Islam» atty kitabyn syıǵa tartty.
