Bas múftı «Áziret Sultan» meshitindegi alǵashqy taraýıh namazyna qatysty (FOTO)

Kúlli musylman úmmeti saǵyna kútken qasıetti Ramazan aıy da esigimizden enip, keshe elimizdegi barlyq meshitterde taraýıh namazy bastaldy. QMDB tóraǵasy, Bas múftı Naýryzbaı qajy Taǵanuly respýblıkalyq «Áziret Sultan» meshitindegi alǵashqy taraýıh namazyna qatysyp, jamaǵatty qasıetti aıdyń kelýimen quttyqtady.

Elimizde jarııalanǵan karantındik shekteýlerge baılanysty eki jyl qatarynan oqylmaǵan taraýıh namazymen qaýyshtyryp, osy kúnge jetkizgen Jaratýshy Allaǵa shúkirlik aıtyp, Ramazan aıyn saýapqa toly ótkizýdi tiledi. Aılardyń sultany bolǵan Ramazannyń qadir-qasıetine toqtalyp, múbárak merzimdi izgi amaldarmen kórkemdeýge shaqyrdy.

Sondaı-aq, elimizdiń Bas meshitinde otyz kún orazada Quran hatym etip, taraýıh namazyn ótkizetin qarılardy jamaǵatqa tanystyrdy. Aıta keteıik, bıylǵy Ramazan aıynda taraýıh namazdaryn elimizge belgili qarılar – «Áziret Sultan meshitiniń qyzmetkerleri Jumanazar Sadyrhanov, Murtaza Balahmet, Erbolat Shaýdyrbaı jáne Túrkistan oblysy, Tólebı aýdanynyń týmasy Mansýrhan Sarvarhanuly ótkizetin bolmaq. 12 jastaǵy bala qarı byltyrǵy jyly Túrkistan qalasynda ótken Respýblıkalyq Quran baıqaýynda II oryn ıelengen bolatyn.

Sýretterdi «FOTOGALEREIa» aıdarynan kóre alasyzdar!