Bas múftı «Áziret Sultan» meshitinde juma ýaǵyzyn aıtty (VIDEO)
Búgin QMDB Tóraǵasy, Bas múftı Naýryzbaı qajy Taǵanuly elordadaǵy respýblıkalyq «Áziret Sultan» meshitinde «Ómirdiń qundylyǵy men qadir-qasıeti» taqyrybynda juma ýaǵyzyn aıtty.
Bas múftı jamaǵatqa ómirdiń adam balasyna berilgen úlken nyǵmet ekenin, ony Alla Taǵala belgilegen ýaqytqa deıin ǵıbratty, ıgilikke toly etip súrýdiń mańyzyn aıta kelip, óz-ózine qol jumsaý, zııan tıgizý men zulymdyq jasaýdyń qanshalyqty aýyr azapqa ushyratatynyn tilge tıek etti.
«Adam balasy ómirdiń shynaıy qundylyǵy men mánin túsinýi úshin myna jaıttardy bilip, amal etýi mańyzdy sanalady: Eń aldymen ómirdiń bizge berilgen amanat ekendigin bilý, odan keıin ózine qol jumsaýdyń jazasynyń aýyr ekendigin eskerý kerek, sondaı-aq taǵdyr taýqymetine sabyr etip, úmitsizdikke salynbaýǵa tıispiz.
Paıǵambarymyz (oǵan Allanyń salaýaty men sálemi bolsyn) Imam Tırmızı jetkizgen hadıste: «Adamdardyń jaqsysy – ómir jasy uzaq ári amaldary izgi bolǵandary» degen. Endeshe ómir jasymyzdyń uzaq bolýyn Alladan tilep, jaqsy amaldardy iske asyrýǵa, jamandyqtan boıymyzdy alys ustaýǵa tyrysaıyq», – dedi QMDB Tóraǵasy.
