BAS MÚFTI «ÁZIRET SULTAN» MEShITINDE JUMA ÝAǴYZYN AITTY (FOTO)

Búgin Qazaqstan musylmandary dinı basqarmasynyń tóraǵasy Naýryzbaı qajy Taǵanuly elordadaǵy «Áziret Sultan» meshitinde juma ýaǵyzyn aıtty.

«Qajylyq – bes paryzdyń biri» taqyrybynda ýaǵyz aıtqan Bas múftı: «Islamnyń bes tireginiń biri – qajylyq qulshylyǵy. «Qajylyq» sózi arab tilinde «qurmetti oryndy zııarat etý» degen maǵynany bildiredi. Al sharıǵatymyzda aı kúntizbesi boıynsha zýl-hıjja aıynda Alla Taǵalaǵa qulshylyq etý úshin qasıetti Mekkege baryp, bekitilgen rásimderdi oryndaýdy qajylyq dep ataımyz.

Balıǵat jasyna tolǵan, aqyl-esi durys, densaýlyǵy jaramdy jáne qarajaty jetetin musylmanǵa ómirinde bir márte qajylyqqa barý – paryz. Alla Taǵala qasıetti Qurannyń «Álı Imran» súresi, 97-aıatynda: «Allanyń úıin zııarat etýge shamasy keletin árbir adam úshin qajylyqqa barý – onyń moınyndaǵy Allanyń aqysy. Al eger kimde-kim kúpirlik qylyp, qajylyqty joqqa shyǵarsa, (bilip qoıyńdar), Alla eshkimge muqtaj emes, kerisinshe búkil ǵalam Oǵan muqtaj», – dep aıtqan.

Qajylyq qulshylyǵynyń ózge qulshylyqtardan birshama ózgeshelikteri men erekshelikteri bar. Jalpy alǵanda qulshylyqtar oryndalý barysyna qaraı dene jáne dúnıe-múlik arqyly ekige bólinedi. Al qajylyq – dene ári dúnıe-múlik arqyly oryndalatyn bes paryzdyń biri» dedi.

QMDB Tóraǵasy juma namazynan keıin meshit jamaǵatymen birge el amandyǵy men tynyshtyǵy úshin duǵa jasady.