Bas múftı aýrýhanadaǵy Arys azamattaryn zııarat etti (FOTO)

QMDB Tóraǵasy Serikbaı Oraz Shymkentke jetken boıda, tike oblystyq aýrýhanaǵa tartty. Arystyqtardyń qal-jaıyn surasyp, az-kem suhbattasty.

Bas múftı: «Bir ǵana otbasyǵa emes, ultqa túsken synaq boldy. Allaǵa shúkir, aýyzbirshilik, yntymaǵymyz bar eken, halyq kóterip te, bólisip te jatyr. Aman-esen aıyǵyp ketýlerińizge tilektespiz. “Aýyryp turdyń – aýnap turdyń” degen bar. Áli-aq bári de umytylyp ketedi. Bala-shaǵalaryńyzdyń, elimizdiń nesibesi úshin aman bolyńyzdar»,- dedi.

Arystaǵy jarylys kezinde 165 adam jaraqattanǵan. Onyń 15-i jansaqtaý bóliminde jatsa, toǵyzynyń qali nashar.

Densaýlyq saqtaý mınıstri naýqastarǵa Almatydaǵy ǵylymı-medıtsınalyq ortalyqtan eki mobıldik top kómekke kelgenin málimdegen. Báriniń jaǵdaıy memlekettik baqylaýda.

Búgin mert bolǵandardyń sany úsheýge jetti. Alla Taǵala aldarynan jarylqasyn, otbasylaryna sabyr bersin dep tileımiz.