Bas meshittegi qaıyrymdylyq jármeńkesi jalǵasý ústinde (FOTO)
Ár juma saıyn jamaǵatty dámi til úıirgen tátti taǵamdarymen qarsy alatyn «Qaıyrymdylyq jármeńke» saýdasy búgin respýblıkalyq «Áziret Sultan» meshitinde taǵy qyz-qyz qaınady. «Áziret Sultan» meshitiniń áıel jamaǵatynan quralǵan «Inabat» qyz-kelinshekter klýbynyń uıytqy bolýymen jamaǵatqa túrli taǵam túrleri men tátti bálishter, ulttyq sýsyn túrleri usynylyp, qasıetti juma kúninde saýapty saýda jasaýǵa jol ashty.
Aıta keteıik, «Meıirimdilik mekeni» jobasy aıasynda turaqty túrde ótkizilip kele jatqan jármeńkeden jınalǵan qarajat sońǵy tıynyna deıin «Áziret Sultan» meshitiniń áıel jamaǵatynyń dáneker bolýymen túrli qaıyrymdylyq sharalaryna jumsalyp keledi. Bas meshittiń áıel jamaǵaty buǵan deıin birneshe márte jármeńkeden túsken qarjyǵa «Ana men bala» ortalyǵyndaǵy, qalamyzdaǵy onkologııa aýrýhanasyndaǵy naýqastarǵa, Qarttar úıi men jetimder úıine syılyq jasap, zııarat etip qaıtqan bolatyn.
Jamaǵattyń rahmetin alyp, naýqas jandardyń saýyǵýyna kómektesýge múmkindik syılaǵan qaıyrymdylyq jármeńkesine qatysýshylardyń qatary da sońǵy kezderi kóbeıe túskendeı. Sońǵy kezderi áıel jamaǵaty ázirlegen taǵamdarmen qatar jármeńke sórelerinde paıda bolǵan túrli dinı buıymdar men kıim túrleri, qolóner týyndylary men rýhanı-dinı kitaptar da osyny aıǵaqtaı túsetindeı.
Igi sharaǵa atsalysamyn deıtin Elorda turǵyndary ár beısenbi kúni "Áziret Sultan" meshitine kelip, ózderi ázirlegen ónimderin ótkizse bolady.
Sýretterdi «FOTOGALEREIa» aıdarynan kóre alasyzdar!
