Bas meshitte Oraza aıt namazy oqyldy (FOTO+VIDEO)

Búgin musylman qaýymynyń ulyq merekeleriniń biri – Oraza aıt meıramy bastaldy. Elimiz boıynsha tańǵy saǵat 07.00-de meshit aýlalarynda aıt namazy oqylyp, ulyq mereke qulshylyqpen bastaý aldy.

Elorda tórindegi respýblıkalyq «Áziret Sultan» meshitindegi aıt namazyna QMDB tóraǵasy, Bas múftı Naýryzbaı qajy Taǵanuly qatysyp, jamaǵatty Oraza aıt merekesimen quttyqtady. Aıt merekesiniń qadir-qasıetin ashyqtap, búgingi kúndi berekeli, saýapty ótkizýge shaqyrdy. Nasıhat sońynda jamaǵatqa aıt namazynyń oqylý tártibin túsindirip, pandemııalyq jaǵdaıǵa baılanysty araqashyqtyq máselesine de jiti mán berý kerektigin aıtyp ótti.

Nur-Sultan qalasynyń bas ımamy Erbolat Júsipov aıt namazyna ımamdyqqa shyǵyp, jamaǵatqa aıt qutpasyn jetkizdi. Namaz sońynda jamaǵatpen birge duǵa jasalyp, elimiz ben jerimizdiń amandyǵyn tilep QMDB Pátýa bóliminiń meńgerýshisi, ustaz Sansyzbaı Qurbanuly bata qaıyrdy.

Sýretterdi «FOTOGALEREIa» aıdarynan kóre alasyzdar!