Bas meshitte «Onlaın Quran hatym» jobasy bastaldy (FOTO)
Búgin elimizdiń Bas meshitinde Nur-Sultan qalasy ókildiginiń uıymdastyrýymen «Onlaın Quran hatym» jobasy bastaldy. Bas múftı Naýryzbaı qajy Taǵanulynyń bastamasy negizinde qaıta iske qosylǵan joba aıasynda Elorda meshitteriniń qarılary qasıetti Quran kárimdi hatym etetin bolmaq. Igi shara shilde aıynyń 7-si men 21-i aralyǵynda ár kún saıyn 12.00 men 20.30-da «Áziret Sultan» meshitiniń ınstagram paraqshasynda tikeleı Efırden kórsetilip otyrady.
Aı basynda ótken jınalys barysynda Bas múftı Naýryzbaı qajy Taǵanuly oblystyń bas ımamdaryna sanıtarlyq talaptardy qatań saqtaýdy, halyqqa psıhologııalyq qoldaý bildirip, kóbirek ıstıǵfar, salaýat aıtý jáne onlaın ýaǵyz-nasıhat pen Quran hatym oqýdy jandandyrý jaıly bastama kótergen bolatyn. Igi bastamaǵa belsene ún qosqan Elorda qarılary búgin qasıetti Quran kárimdi hatym etýge kiristi. Esterińizde bolsa, onlaın Quran hatym jobasy elimizde karantın rejımi engizilisimen Bas meshitte bastaý alyp, Nur-Sultan ókildiginiń qyzmetkerleriniń arnaıy kestesi túzilip, táýlik boıy úzilmesten Quran oqylyp shyqqan bolatyn.
Atalmysh joba endi Elordamyzdaǵy qarılardyń qatysýymen qaıta jalǵasyp otyr. Qasıetti Quran kitabyn tolyǵymen jattap, qate-kemshiliksiz oqıtynyn halyqaralyq Quran jarystary men ǵulama bilgirler aldynda abyroımen aqtap shyqqan qarılar qatary Elorda meshitterinde kóptep kezdesedi. Solardyń qatarynda Jumanazar Sadyrhanov, Dinmuhammed Smanov, Erlan Bazarbaıuly («Áziret Sultan» meshiti), Ádilhan Serikbaı («Áljan ana» meshiti), Salmon Abdýlhafızuly («Nur Astana» meshiti), Kýler Nýrettın («Ǵylmanı» meshiti), Aqjolov Baǵzat («Aqmeshit»), Hadyrshaev Abdýlbasıt («Ál-Ǵanı» meshiti) syndy Quran úzdikteri qazirgi tańda Elorda meshitterinde jemisti qyzmet etýde.
