Bahreın Astanada jańa mektep salady

Astana ákimi Baqyt Sultanov Bahreın Hanzadasynyń atyndaǵy qaıyrymdylyq qorynyń bas hatshysy Mustafa Álı Muhammed Ál Saıed myrzamen kezdesti.

Kelissózderden keıin taraptar Astanada bilim obektisiniń qurylysyn salý múmkindigine toqtaldy, dep habarlaıdy BNews.kz elorda ákimdiginiń resmı saıtyna silteme jasap. Aıta keteıik, 2014 jyly Bahreın hanzadasy Hamad ben Isa ál Halıfa Qazaqstanǵa resmı sapary kezinde áleýmettik nysannyń qurylysyn salý týraly kelisimge qol qoıǵan, ol Bahreın Koroldiginiń Astanadaǵy sımvoly ispettes bolady.

Kezdesýdiń sońynda Astana ákimi Baqyt Sultanov qaıyrymdylyq qorynyń bastamasyna jan jaqty qoldaý kórsetýge ýáde berdi. Al óz tarapynan Mustafa Álı Muhammed Ál Saıed myrza qarym-qatynas pen kelissózderge kóńili tolǵanyn jetkizdi. Joǵary shendi qonaqtar bolashaqta salynatyn ǵımarat Astanany erekshe arhıtektýramen tolyqtyra túsetinine senimdi.

"Eki ǵımarat birdeı bolmaıdy, birdeı kósheler de joq. Árqaısysy ár túrli, biraq bárinde de onyń tamasha kelbeti kórinip turady. Eki memleketti jaqyndastyra túsetin kóptegen faktorlar bar", - dedi Bahreın Hanzadasy atyndaǵy qaıyrymdylyq qorynyń bas hatshysy Mustafa Álı Muhammed Ál Saıed myrza kezdesý sońynda.

Onyń aıtýynsha, Qazaqstan men Bahreın koroldiginiń arasyndaǵy kóptegen uqsastyqtar bar.

"Sizder de munaı bar, bizde de munaı bar. Sizder qonaqjaı halyqsyzdar, biz de qonaqjaı halyqpyz. Qazaqstannyń Táýelsizdik kúni – 16-17 jeltoqsan, Bahreınniń de Táýelsizdik kúni – 16-17 jeltoqsan", - dedi ol.

Mustafa Álı Muhammed Ál Saıed myrza Qazaqstan men Bahreınniń Astanadaǵy bilim berý obektisiniń (mektep) qurylysy týraly jobanyń bastalǵany týraly Bahreın Hanzadasy atyndaǵy qaıyrymdylyq qory osy jyldyń 16-17 jeltoqsanyna deıin habarlaıtynyn aıtty.