«BABALAR IZIMEN: QAZAQ DALASYNDAǴY MUSYLMANDYQ MEKTEP» KITABY TANYSTYRYLDY (FOTO)

«Áziret Sultan» meshitinde «Babalar izimen: Qazaq dalasyndaǵy musylmandyq mektep» kitaby jamaǵatqa tanystyryldy.

Igi sharaǵa Astana qalasynyń ókili, «Áziret Sultan» meshitiniń bas ımamy Erbolat Júsipov pen aqsaqaldar, aq jaýlyqty ájeler, meshittiń ımam, ustazdary men shákirtteri qatysty.

Jamaǵatqa eńbektiń qundylyǵy túsindirilip, kitaptyń qysqasha mazmuny tanystyryldy. Sondaı-aq, aqsaqaldar tarapynan kitaptyń lentasy qıylyp, jıynǵa qatysqan jamaǵatqa taratyldy.

Bul eńbekte asyl dinimiz ıslamnyń Qazaq dalasyna kelý tarıhy, halqymyzdyń ádet-ǵurpy men salt-dástúrindegi dinniń alar orny men babalar ustanǵan sharıǵat paryzdary, ıman negizderi, sondaı-aq musylmandyq ádep joralǵylary qamtyldy. Kitap úsh bólimnen turady. Birinshi bólim «Dástúrli dinı tanymnyń tarıhı negizderi» dep atalady. Ekinshi bólim dástúrli dinı tanym ustyndaryna arnaldy. Al úshinshi bólimde din men dástúr sabaqtastyǵy keńinen jazylǵan.