Ata zań hám adamnyń ar-ojdany

30 tamyz – elimizdiń ár azamaty úshin aıtýly kún. Bul – barshaǵa ortaq mereke – Konstıtýtsııa kúni. Eldiń Ata Zańy, memlekettiń nyshany men rámizderi – ár adamnyń qasıet tutar qundylyǵy.

Ata Zańymyzdyń alǵashqy babynda aıqyn jazylǵandaı, memlekettiń eń qymbat qazynasy – adam jáne onyń ómiri, quqyqtary men bostandyqtary. Tegine, násiline, ultyna, tili men dinine baılanysty eshkimdi kemsitýge bolmaıdy. Óıtkeni, Konstıtýtsııa boıynsha adamnyń qadir-qasıetine qol suǵylmaıdy.

Asyl dinimiz – Islamda adamnyń qadir-qasıeti, ar-ojdany, nanym-senimi joǵary mártebege ıe. Alla Elshisi: «Ýa, halaıyq! ...Myna qala (Mekke) qandaı qasıetti bolsa, jandaryń, maldaryń, namystaryń da sondaı qasıetti, ártúrli zorlyq-zombylyqtan qorǵalǵan...» – dep ósıet qaldyrǵan. Quran Kárimde «Baqara» súresiniń 256-aıatynda: «Dinde zorlyq joq...» – dep baıandalǵan.

Adamzat balasy qaýymdasyp ómir súrýge beıim jaratylǵan. Qoǵamdyq tártip ornaǵan qaýym qashan da órkenıet kóshinen qalmaǵan. Dańqty batyr babamyz Baýyrjan Momyshulynyń:«Tártipsiz el bolmaıdy, tártipke baǵynǵan qul bolmaıdy», – degen ulaǵatty sózi kóp jaıtty uǵyndyrsa kerek...

Alla Taǵala jurtymyzǵa tynyshtyq, elimizge amandyq bersin! Ata Zańymyzdy ardaqtaǵan beıbit súıer halqymyzdyń berekesi tasyp, yrysy molaısyn. Yntymaqqa uıysqan ultymyzǵa tatýlyq máńgilik turaqtasyn dep tileımiz. Ámın!   

Serikbaı qajy ORAZ, 
QMDB tóraǵasy, Bas múftı