ASTANA ÓKILDIGI ÚII ÓRTENGEN EKI OTBASYǴA QARJYLAI KÓMEK BERDI (FOTO)

QMDB Astana qalasy ókildiginiń uıytqy bolýymen búgin baspanasy órtenip ketken eki otbasyǵa qarjylaı kómek kórsetildi. Qala bas ımamy Erbolat Júsipov apatqa ushyraǵan otbasylardy arnaıy zııarat jasap, 500 000 jáne 600 000 teńge qaıyrymdylyq sertıfıkatyn tabystap qaıtty.

Maıqutov jáne Esenberlın kóshelerinde turatyn qos otbasynyń da bes balasy bar kórinedi. Qarashanyń qaqaǵan sýyǵynda jaqsy lebiz, janashyrlyqtyń ózi jylý ekenin aıtqan olar qaıyrymdylyq sharasyna atsalysqan barsha jandarǵa alǵystaryn jetkizdi. Aıta keteıik, qos otbasynyń basyna túsken aýyrtpashylyqty estigen QMDB Astana ókildigi boıynsha qaıyrymdylyq jumystaryna jaýapty «Zeket jáne qaıyrymdylyq» qorynyń ókili Mereı Jaqııa, «Kóktal» meshitiniń bas ımamy Ilııas Otarov, «Aqmeshit» meshitiniń naıb ımamy Farhat Isauly arnaıy jamaǵatty osy sharaǵa jumyldyrǵan bolatyn.