Aqtóbe: 308-shi baspana tabystaldy (FOTO)
Bas múftı Naýryzbaı qajy Taǵanuly aýyl-aýdandarda qyzmet etip júrgen jas dinı mamandarǵa árdaıym áleýmettik qoldaý kórsetip otyrýdy jergilikti ókildikterge júktegen-di. Osyǵan oraı, ımamdardyń turaqty qyzmet etýin qamtamasyz etý maqsatynda Aqtóbe oblysynda 6 ımamǵa qyzmettik úı retinde keıbirine jeke baspana retinde 6 páter tabystaldy.
QMDB-nyń 30 jyldyq mereıtoıyna oraı, Aqtóbede taǵy da bir ımam jeke baspanaly bolyp otyr. Ol – Hromtaý aýdanynyń bas ımamy Erik Sultanov. Onyń atalmysh aýdanǵa aýysyp kelgenine kóp bola qoıǵan joq. Dese de, «aǵaıyn tatý bolsa, as kóp» demekshi, Hromtaýda turatyn Gúlnaz Qonaqbaıqyzy men Marat Elýbaıuly esimdi týystarynyń demeýshiligimen Erik ımamǵa 2 bólmeli páter syıǵa tartý etildi.
Saltanatty sharaǵa oblystyń bas ımamy Tólebı qajy Ospan, «Zeket» qorynyń Aqtóbe oblysyndaǵy jaýapty ókili Almat Álı, Hromtaý aýdany, Qoǵamdyq keńestiń tóraǵasy Bolat Ashabaev, Hromtaý aýdandyq Ardagerler keńesiniń tóraǵasy Qýanysh Birjanov jáne qala turǵyndary qatysty. Qonaqtar júrek jardy lebizderin jetkizip, baspanaly bolǵan ımamnyń aýdanda abyroımen eńbek etýine tilek bildirdi.
«Búgin aǵaıyn-týystyń járdemimen «El úlesi páterge» aktsııasy aıasynda Erik ımam baspanaly bolýda. Barshamyz úshin úlken qýanysh. Bul – meshit qyzmetinde halyqqa aıanbaı eńbek etýge jol ashady dep sanaımyz. Paıǵambar hadısinde er azamattyń úsh baqyty bar degen. Sonyń biri – jaıly baspana. Alla Taǵala shańyraǵyńdy shattyqqa toly etip, jaıly baspana bolýyn násip etkeı», - degen tilegin jetkizdi bas ımam Tólebı Ospan.
Esterińizge sala keteıik, QMDB «Zeket» qorynyń «El úlesi páterge» aktsııasy az ýaqyt ishinde 308 otbasyn qýanyshqa bólep úlgerdi. Joba aıasynda Aqtóbe ókildiginiń uıytqy bolýymen oblysta 13 baspana berildi.
