AQQUM AÝYLYNYŃ «TUŃǴATAR» MEShITINDE RÝHANI SAIYS ÓTTI (FOTO)

Jambyl oblysy, Talas aýdany, Aqqum aýylynyń «Tuńǵatar» meshitinde Qurannyń jarty parasy men Allanyń 99 kórkem esimin jatqa aıtý jáne áýezdi azan jarysy bolyp ótti.

Jarysqa óńirdiń túrli meshitterinen úmitkerler qatysyp, ózara baq synady. Saıys barysyna QMDB-nyń Jambyl oblysy boıynsha bas ımamy Asqar Zákirjanuly arnaıy kelip, qatysýshylarǵa sáttilik tiledi. Sondaı-aq, «Hıbatýlla Tarazı» qaıyrymdylyq mekemesiniń dırektory Amankeldi Birlik jáne Talas aýdanynyń bas ımamy Jalǵasbaı Jubatqanovpen birge qazylar alqasynda bolyp, jarysqa ádil baǵasyn berdi.

Aıadaı ǵana aýyl meshitinde ótken rýhanı keshte qasıetti Ramazan aıynyń mol bereketi sezildi. Qatysýshy shákirtter bar bilimderin ortaǵa salyp, qazylar alqasy men kórermenderdi tánti etti.

Jaqsylyqta jarysýshylar qasıetti Quran aıattaryn mánerlep oqyp, jatqa aıtý sheberlikterin kórsetse, taǵy bir top Allanyń 99 kórkem esimin jatqa aıtyp, áýezdi daýystarymen azan shaqyryp jatty.

Dástúrli maqam men durys dybystaý erejeleri qazylar tarapynan joǵary baǵalandy. Is-shara sońynda jeńimpazdar men belsendi qatysýshylarǵa marapattar tabystalyp, olarǵa baǵaly syılyqtar men alǵys hattar berildi. Quran saıysynyń basty júlde ıegerine Umra qajylyǵyna joldama tabystaldy.

Uıymdastyrýshylar mundaı rýhanı is-sharalardyń jastardyń dinı bilimin arttyrýǵa jáne ilimge degen súıispenshiligin oıatýǵa zor yqpal etetinin atap ótti. Jamaǵat ta bul basqosýdyń erekshe áser qaldyrǵanyn aıtyp, osyndaı ıgi bastamalar jıi uıymdastyrylsa degen tilekterin bildirdi.

Saıys qorytyndysy boıynsha oryn alǵan qatysýshylar tómendegideı:

Quran saıysy boıynsha: 
Bas júlde – Rátbek Erasyl, Talas aýdandyq «Qarataý Qajy bı» meshiti; 
I oryn – Dúısenbi Aıan, Tamdy aýyly, «Táńkibaı ata» meshiti; 
II oryn – Lesbek Ismaıyl Bolatuly, Talas aýdandyq «Qarataý Qajy bı» meshiti;
III oryn – Qurmanbaı Raıan, Talas aýdandyq «Qarataý Qajy bı» meshiti.

Áýezdi azan saıysy boıynsha: 
I oryn – Ábýmuhammed Álı, Bostandyq aýyly «Tórtbaı ata» meshiti;
II oryn – Kóbesov Qaırat, Qarataý qalasy «Ábdirashıt ata» meshiti;
III oryn – Qosanov Danıar, Talas aýdandyq «Qarataý Qajy bı» meshiti.

Allanyń 99 kórkem esiminen: 
I oryn – Itemgen Nuralı Temirlanuly, Aqqum aýyly «Tuńǵatar ata» meshiti; 
II oryn – Ábýtalı Aqylbek, Talas aýdany, Qarataý qalasy «Ábdirashıt ata» meshiti; 
III oryn – Izbas Aıanat, Shákırov aýyly «Baıtoqty baba» meshiti.

Источник: Aidos