Almatyda jyn shyǵarmaq bolǵan emshi naýqasty óltirip aldy
Almaty oblysynda 28 jastaǵy er adamnyń ólimine sebepker bolǵan halyq emshisi qamaýǵa alyndy. Bul týraly Baq.kz saıty oblystyq Polıtsııa departamentiniń baspasóz qyzmetine silteme jasap habarlaıdy.
12-qańtar kúni óz úıinde turǵylyqty azamattyń mezgilsiz kóz jumýyna baılanysty aqparat Qarasaı aýdanynda tirkelgen. Sot-medıtsınalyq tekserýiniń nátıjesinde keýde qýysynyń tuıyq jaraqaty, qabyrǵalarynyń synýy men ókpeniń jaraqattanýy er azamattyń ólimine sebepker bolǵany anyqtaldy. Jábirlenýshige túrli aýyr dene jaraqatyn salý barysynda onyń ólimine ákelýge qatysy bar degen kúdikpen polıtseıler «halyq emshisiniń » ústinen qylmystyq is qozǵady.
«Polıtsııaǵa qaıtys bolǵan azamattyń týystarynan áli kúnge aryz túsken joq. Alaıda bul fakti boıynsha RQ Qylmystyq kodeksiniń 106-baby 3-tarmaǵyna sáıkes sotqa deıingi tergeý amaldary júrgizilýde. Qylmystyq iste kúdikti retinde dástúrli emes medıtsına qyzmetimen aınalysatyn 63 jastaǵy er adam aıyptalýda» — delingen habarlamada.
Aıta keteıik, «halyq emshisine» jábirlenýshini onyń týystary alyp kelgen. Olardyń pikiri boıynsha, jas azamatqa jyn kirgen jáne ol sońǵy úsh jyl ishinde sol jyn áserinen qıyndyq kórgen. «Halyq emshisiniń» 5 kún ishinde túrli ádisterdi qoldaný arqyly jas azamattan jyndy shyǵarý saldarynan jábirlenýshiniń kóz jumýy múmkin.
Baspasóz qyzmetiniń málimetinshe, bul is Qarasaı aýdany polıtsııasynyń qaraýynda, qazirgi ýaqytta kúdikti ýaqytsha ustaý oqshaýlaǵyshyna qamaqqa alynǵan.
