Almatyda terakt uıymdastyrmaq bolǵan shetel azamattary sottaldy

Almatyda Tájistan Respýblıkasynyń jeti azamatyna qatysty qylmystyq isti qarastyrý aıaqtaldy.

Olar Islam Respýblıkasy Aýǵanstanda júrgen «Shahamad» esimdi rýhanı tálimgerleriniń bastaýymen 2018 jyldyń jeltoqsanynan 2019 jyldyń 10 qańtaryna deıin lańkestik toptyń quramynda bolyp, radıkal dinı senimder negizinde terrorızm aktilerin jasaýǵa daıyndaǵany úshin aıyptalǵan.

Qylmyskerler Latıf Hamıdı kóshesiniń boıynda ornalasqan Iver-Serafım monastyry men Mánshúk Mámetova kóshesindegi «ATF Bankke» ózderi jasaǵan jarylǵysh qurylǵyny qoldanyp, shabýyldamaq bolǵan.

Sot úkimi boıynsha qylmyskerlerge 12 men 18 jyl aralyǵynda bas bostandyǵynan aıyrý jazasy taǵaıyndalǵan. Olardyń barlyǵy jazasyn ortasha qaýipsizdiktegi qylmystyq atqarý júıesi mekemelerinde óteıdi. Negizgi jazany ótegennen keıin sottalǵandar Qazaqstan Respýblıkasynan májbúrli túrde shettetilip, respýblıka aýmaǵyna bes jylǵa kirýge tyıym salynady.

Úkim áli zańdy kúshine engen joq.