ALMATYDA «IZGILIK JARShYSY – MUHAMMED (ﷺ)» ATTY MÁÝLIT KEShI ÓTTI (FOTO)
Qazaqstan musylmandary dinı basqarmasynyń uıymdastyrýymen Almatyda «Izgilik jarshysy – Muhammed (ﷺ)» taqyrybynda rýhanı máýlit keshi ótti. Adamzattyń ardaqtysy Paıǵambarymyz (oǵan Allanyń salaýaty men sálemi bolsyn) dúnıege kelgen máýlit aıynyń qurmetine ótken rýhanı keshke Bas múftı Naýryzbaı qajy Taǵanuly arnaıy qatysty.
Elimizde eńbek kúnimen tuspa-tus kelgen keshte QMDB Tóraǵasy jınalǵan kópshilikti múbárak máýlit aıymen quttyqtap, adamdardy Paıǵambarymyz (oǵan Allanyń salaýaty men sálemi bolsyn) nasıhattaǵan izgilik jolyna, adamgerlishilik pen eńbekqorlyqqa, sondaı-aq Quran Kárimdi qurmetteýge shaqyrdy.
«Asyl dinimiz Islamda izgi amal jasaýdyń mańyzy óte úlken. Izgi amal dep jeke adamǵa nemese qoǵamǵa paıda alyp keletin, ózgelerdiń jaǵdaıynyń jaqsarýyna yqpal etetin amaldy ataımyz. Qasıetti Qurannyń kóptegen aıattarynda: «Rasynda ıman etip ári izgi amal jasaǵandar», – dep, ımanmen qatar izgi amal jasaý birge aıtylady. Bul aıattar Alla Taǵalaǵa ıman etip, aqyretten úmiti bar jan úshin ıgi amal jasaýdyń qanshalyqty úlken mańyzǵa ıe ekendigin kórsetedi.
Alla Taǵala bizderdi izgilikke buıyrýmen qatar, qalaı izgi adam bolýymyzdy úlgi etip kórsetý úshin súıikti Paıǵambarymyz Muhammed Mustafany (oǵan Allanyń salaýaty men sálemi bolsyn) paıǵambar etip jiberdi. Paıǵambarymyz da, qasıetti Quran da barlyq ıman etken álem musylmandary úshin óte qasterli. Ókinishke qaraı qazirgi tańda musylmandardyń osy qasterli uǵymyna til tıgizip jatqandar da tabylýda. Osyǵan oraı Prezıdentimiz kúni keshe ǵana Birikken ulttar uıymynda sóılegen sózinde: «Jýyrda qasıetti kitaptarǵa qurmetsizdik tanytý aktileri boldy. Biz osy jaǵdaıǵa alańdaýshylyq bildiremiz. Islamǵa jáne basqa da dinderge qatysty jasalǵan mundaı taǵylyq áreketterden erkindiktiń, sóz bostandyǵynyń jáne demokratııanyń nyshany bilinbeıdi. Quran sekildi qasıetti kitaptardyń bári vandalızmnen quqyqtyq turǵyda qorǵalýǵa tıis», – dep, álemdik deńgeıde óte ózekti máseleni qozǵady. Biz bul aıtylǵan sózderge tolyǵymen qosylamyz» dedi Bas múftı.
Zııaly qaýym ókilderi, aqsaqaldar men meshit jamaǵaty, ımamdar men qala turǵyndary qatysqan keshte aqyn, sazger Jáken Omarov Paıǵambarymyzdyń (oǵan Allanyń salaýaty men sálemi bolsyn) ómirbaıanynan Mekkeniń azat etilýin qazaq tilinde jyrlady. Máýlitke arnalǵan merekelik sharada «Óner qyrandary» teatry sahnalyq qoıylymdar qoıdy. Estrada ánshileri ıláhı ánder men termeler oryndap, Paıǵambarǵa degen saǵynyshtaryn ánmen jetkizdi.
Sonymen qatar Paıǵambar súnnetin ómirine temirqazyq etip ósip kele jatqan jas jetkinshekter Paıǵambarymyz (oǵan Allanyń salaýaty men sálemi bolsyn) jaıly óleńder oqydy. Shara sońynda Máýlit rýhanı keshiniń bıletterinen túsken qarajatty Bas múftı Naýryzbaı qajy Taǵanuly kópshiliktiń aldynda muqtaj kisilerge tabystady.
