Almatyda búldirshinder arasynda III Quran jarysy ótti (FOTO)

QMDB-nyń Almaty qalasy ókildiginiń uıymdastyrýymen Almaty Ortalyq meshitinde búldirshinder arasyndaǵy III Quran jarysy ótti.  Jarysqa elimizdiń ártúrli aımaqtarynan 95 búldirshin qatysty:52 – ul bala, 43 – qyz bala. Olar Quran Kárimniń «Mutaffıfın» súresinen «Nas» súresine deıin jatqa oqyp, ózara baq synasty.

Dodaly jarystyń shymyldyǵyn qalamyzdyń Bas ımamy Erkinbek qarı Kerimbekuly ashyp, óziniń júrekjardy lebizin bildirdi:

«Qurmetti musylman baýyrlar! Ardaqty ata-analar! Búgingi dodaly jarysymyzǵa qosh kelipsizder! QMDB-nyń tóraǵasy, Bas múftı Serikbaı qajy Oraz hazrettiń qoldaýymen ótip jatqan búldirshinder arasynda III Quran jarysyn Alla Taǵala bárimizge qutty da berekeli etsin! Eldiń baıandy bolashaǵy men kemel keleshegi – búgingi búldirshin, erteńgi jastardyń qolynda. Sondyqtan da búgingi jarystyń negizgi maqsaty – óskeleń urpaǵymyzdy Quran taǵylymynan nár alǵan, ımandy da adamgershiligi mol, ǵylym-bilimge qumar azamattar etip tárbıeleý bolmaq. Osy rette men jarysqa qatysýshy barlyq búldirshinderimizge sáttilik tileımin. Alla barshamyzdan razy bolsyn!», – dedi.

Tóreshiler jarysta Quran aıattaryn qatesiz, mánerlep oqýda júldeli oryndarǵa ıe bolǵan búldirshinderimizge qarjylaı syılyqtar tabystady. Al, erekshe kózge túsip, yntalandyrý syılyǵyna ıe bolǵandarǵa velosıpedter berildi. Jarysqa qatysqany úshin qalǵan búldirshinderimizge arnaıy syılyq retinde samakattar tartý etildi.

Ul balalar arasynda III Quran jarysynyń júldegerleri:

I oryn – Saıatuly Álı, Almaty qalasy (100 000 tg).
II oryn – Orynbasaruly Halıd, Túrkistan oblysy (75 000 tg).
III oryn – Babanazaruly Ádilhan, Almaty oblysy (50 000 tg).

Qyz balalar arasynda III Quran jarysynyń júldegerleri:
I oryn – Abdýlǵanı Jasmın, Almaty qalasy (100 000 tg).
II oryn – Muqambetqalı Begimsulý, Qyzylorda oblysy (75 000 tg).
III oryn – Janarbekqyzy Amına, Almaty qalasy (50 000 tg).