«Allanyń sıpattaryn durys túsiný» taqyrybynda ýaǵyz aıtyldy (FOTO)

Respýblıkalyq «Áziret Sultan» meshitiniń shákirtterine arnalǵan jeksenbilik ýaǵyzdar qyrkúıek aıynyń ortasynan beri qaıta bastalǵanyn habarlaǵan bolatynbyz. Aptanyń sońǵy kúni aqsham namazynan soń jıylǵan shákirtter qaýymyna túrli taqyrypta ýaǵyz-nasıhat jumysyn júrgizip, sońynan ujymdyq as berý Bas meshitte birneshe jyldan beri dástúrge aınalǵan bolatyn.

Keshegi ótken jeksenbi kúni de osyndaı ıgi sharaǵa muryndyq bolyp, Bas meshit shákirtteri «Allanyń sıpattaryn durys túsiný» taqyrybynda taǵylymdy ýaǵyz tyńdap qaıtty. «Áziret Sultan» meshitiniń naıb ımamy Nurlan Ramazanov júrgizgen ýaǵyz aıasynda shákirtter mútashabıh (maǵynasy naqty anyq bolmaǵan) aıat-hadısterdiń maǵynasyn durys túsinýdiń tásilderin úırenip, dinı bilimderin tereńdete tústi.

Ýaǵyz sońynda shákirtter suraǵyna kezek berilip, túıtkildi máseleler boıynsha birqatar keleli keńester aıtyldy. Shákirt pen ustaz arasyndaǵy qyzý baılanys jeksenbilik ýaǵyzdan keıingi dastarhan basynda odan ári damı túsip, jalǵasyn tapty.

Ýaǵyzdyń vıdeo nusqasyn aldaǵy ýaqytta saıtymyzdan kóre alasyzdar!