Alkogolden jylyna 3 mıllıon adam kóz jumady

Búkilálemdik Densaýlyq saqtaý uıymynyń (BSU) mamandary álem boıynsha ólim kórsetkishiniń basty sebepteriniń biri retinde alkogoldi ishimdikterdi atap otyr. Bul jaıynda uıymnyń MedicalXpress joldaǵan baspasóz paraǵynda jarııalanǵan eken.

BSU málmeti boıynsha, 2016 jyly ishimdik saldarynan álemde 3 mln jan (búkil ólimniń 5,3 paıyzy) kóz jumǵan. Bul kórsetkish, tipti, SPID aýrýy, zorlyq-zombylyq jáne jol apatynan qaıtys bolǵandardyń kórsetkishinen de asyp túsken. Taǵy bir alańdatatyny – 20 men 29 jastaǵylar arasyndaǵy ólim kórsetkishi tipten asqyna túsedi: búkil ólimniń 13,5 paıyzy.

Sondaı-aq, álem boıynsha 20 ólimniń bireýi mas kúıde kólik júrgizý nemese spırtti ishimdik kesirinen paıda bolǵan aýrýǵa baılanysty oryn alyp turady eken. Taǵy bir janama kesiri – salynyp ishken adamnyń densaýlyǵy da syr berip, VICh, týberkýlez syndy juqpaly aýrýlarǵa qarsy turý ımmýnıeti álsireı bastaıtyn bolady.