Ál-Farabı meshitindegi jastarmen júzdesý
Qazaqstan musylmandary dinı basqarmasy Ýaǵyz-nasıhat bólimine qarasty Jastar isi sektorynyń meńgerýshisi Ádilet Rahymuly Astana qalasyndaǵy Ábý Nasyr ál-Farabı meshitiniń jastarymen kezdesý ótkizdi.
Kezdesý barysynda Ádilet Rahymuly jastarǵa qazirgi qoǵam jastarynyń beınesin sıpattaı kele, Ihsan taqyrybyn basqa qyrynan ashyp berdi.
Elimizde jas urpaqty jastaıynan meıirimdilik, izgilik, qaıyrymdylyq, adamgershilik sekildi qundy qasıetterdi boıyna sińire bilý, sondaı-aq salaýatty, sanaly urpaq tárbıeleý, rýhanı baı adam balasyn qalyptastyrý qajet ekenin aıta kele sektor meńgerýshisi:
«Eger biz táýelsizdigimiz tuǵyrly, egemendigimiz baıandy bolsyn desek, «órkenıetter qaqtyǵysynda» jutylyp ketpeı, ózindik biregeıligimizdi saqtap qalamyz desek, balalar men jasóspirimder tárbıesine erekshe kóńil bólýimiz qajet.
Osy maqsatta balany jas kezinen ulttyq qundylyqtarǵa sáıkes, bolashaq tulǵa retinde tárbıeleý úshin qolda bar quraldar men múmkindikterdi tıimdi paıdalanǵan durys. Atap aıtqanda, balalardyń jas erekshelikterin eskere otyryp, ǵalamtor jelisindegi ózge zııandy aqparattardan nazaryn burý maqsatynda olardyń qyzyǵýshylyǵyn týǵyzatyn paıdaly beınerolıkter, tanymdyq oıyndar men baǵdarlamalardy usynatyn ınternet-resýrstaryn jasaqtaý qajet.
Sebebi búginde ǵalamtor jelisindegi kúmándi resýrstar balalar men jasóspirimderdiń sanasyna keri áserin tıgizýde. Aldyna qoıǵan aıqyn maqsaty joq, ómir súrýge qulyqsyz, eshteńege qyzyqpaıtyn keıbir jastar ókilderiniń arasynda túrli qylmys jasaý men óz-ózine qol salý faktileriniń jıi kezdesetini ras» dep jastar tárbıesiniń mańyzdy tustaryn atap ótti.
Kezdesý sońynda meshit jastary kókeıindegi suraqtaryn qoıyp, pikirlerin bólisti.
