Ábsattar qajy Derbisáli: Búgin – armanym oryndalǵan kún (FOTO)

Búgin elordada Qazaqstan musylmandary dinı basqarmasyn 2000-2013 jyldary basqarǵan, belgili ǵalym, R.B.Súleımenov atyndaǵy Shyǵystaný ınstıtýty dırektorynyń keńesshisi Ábsattar qajy Derbisáli Bas múftı Naýryzbaı qajy Taǵanulymen kezdesti.

Dinı basqarma ǵımaratyn aralaǵan Ábsattar qajy Baǵysbaıuly: «Osydan 10 jyl buryn Bakýge barǵan saparymda ázirbaıjandyq áriptesterimniń ǵımaratyn kórip shyǵyp: «Shirkin-aı, bizdiń Dinı basqarmanyń osyndaı záýlim ǵımaraty bolsa edi» dep armandap edim. Qudaıǵa shúkir, búgin sol armanym oryndalǵan kún. Ár adam óziniń ólsheýli ǵumyrynda iz qaldyrý kerek. Dinı saladaǵy azamattar el ıgiligi úshin kóbirek jumys isteýi kerek. Bas múftı Naýryzbaı qajy Taǵanuly bastaǵan QMDB ujymy aýqymdy ister men qaıyrymdylyq jobalardy júzege asyryp keledi. Alla barshamyzǵa abyroı bersin. Dinı basqarma ujymyn, barsha din qyzmetkerin 30 jyldyq mereıtoımen quttyqtaımyn. Bul – barshamyzdyń ortaq merekemiz. Elimiz ben jerimizdiń ıgiligi úshin aıanbaı qyzmet etý – ortaq mindetimiz. El aman, jurt tynysh bolǵaı!» degen aqjarma tilegin jetkizdi.

Kezdesýde Ábsattar qajy Derbisáli Bas múftıge «Ábý Nasyr ál-Farabı uly dalanyń dara tulǵasy», «Muhamed Haıdar Dýlatı», «Ábsattar qajy Derbisáli jáne Qazaqstannyń shyǵystaný ǵylymy men rýhanı jańǵyrý máseleleri» atty kitaptaryn syıǵa tartty.

Naýryzbaı qajy Taǵanuly ardager ustazyna qurmet kórsetip, ıyǵyna qazaqy dástúrmen shapan japty.