16 MAÝSYM – QURBAN AIT MEREKESINIŃ BIRINShI KÚNI!

Búgin hıjrı jyl sanaýy boıynsha zulhıjja aıy bastaldy. Iaǵnı Arapa kúni bıyl 15 maýsymǵa sáıkes keledi. 16 maýsym – Qurban aıt merekesiniń birinshi kúni.

Islam dininde qasıetti kúnder, túnder jáne aılar qamarı jyl sanaýy negizinde anyqtalady. Mundaı jyl sanaq aı fazasynyń ózgerýine qaraı esepteledi. Jańa aıdyń (hıláldyń) kórinýimen jańa aı bastalady. Qamarı aı keıde 29 ne 30 kún bolady.

Zulhıjja aıyn anyqtaý úshin zulqaǵda aıynyń 29-nda aıdy baqylaıdy. Kún batqan kezde jańa aı kórinse, kelesi kúni zulhıjja aıy bastalǵan bolyp sanalady. Eger aýa bultty bolyp, aı kórinbese, zýl-qaǵda aıyn 30 kúnge tolyqtyrady[1]. Osyǵan oraı, 2024 jyly 6 maýsymda jańa aıdyń kórinýine baılanysty bıyl zulhıjja aıy 7 maýsymda bastalyp, arapa 15 maýsymǵa, al qurban aıt 16 maýsymǵa saı keledi. 

Zulhıjja aıynyń alǵashqy on kúninde barynsha yqylaspen ǵıbadat etip, kóbirek izgi ister men jaqsy amaldar jasaýǵa tyrysý kerek. Óıtkeni, hadısterde sol ýaqytta oryndalǵan ıgi isterdiń saýaby eselenip jazylatyny aıtylǵan.

Al arapa kúni oraza tutý – súnnet. Ardaqty Paıǵambarymyz Muhammed (oǵan Allanyń salaýaty men sálemi bolsyn): «Arapa kúni oraza ustaý arqyly Alladan ótken jáne kelesi jyldyń kúnásin keshirýdi úmit etemin», – degen.

Qurban aıt namazynan keıin úsh kún ishinde jaǵdaıy kelgen musylmanǵa qurbandyq shalý – mindet. Alla Taǵala qasıetti Quranda: «Rabbyńnyń razylyǵy úshin namaz oqy jáne qurbandyq shal» («Káýsar» súresi, 2-aıat) dep buıyrǵan.

Alla Taǵala elimizge amandyq, jurtymyzǵa tynyshtyq bergeı. Izgi nıetpen shalatyn qurbandyǵymyz, qajylyq saparynda júrgen otandastyrymyzdyń qajylyǵy qabyl bolǵaı. Ámın!

[1] «Ál-fátaýa ál-hındııa», 1/217.