JÚREKTI TEKSERETIN QOS SURAQ

Adam balasy jasaıtyn árbir amaly úshin - kishisi bolsyn, úlkeni bolsyn, eki suraqqa jaýap berýi tıis. Iaǵnı, «Ne úshin jasap jatyrmyn»  jáne «Qalaı jasap jatyrmyn». Birinshi suraq amaldyń jasalý sebebi men onda kórsetilgen maqsatty aıshyqtaıdy. Ol amal kezdeısoq jáı áreket pe. joq álde qulshylyq haqyn oryndaýǵa, Allanyń súıispenshiligine bólenip, Oǵan jaqyn bolýǵa jáne Oǵan aparar joldy talap etýge baǵyttalǵan amal ma?

Al, ekinshi suraq amaldyń qalaı jasalǵanyn kórsetedi, ıaǵnı ol jasalynǵan amal Paıǵambarymyz Muhammedtiń (s.ǵ.s.) úmbetine ámir qylǵan isterinen be nemese Allanyń Óziniń Elshisiniń (s.ǵ.s.) tilinde ornatqan sharıǵatynyń buıryqtarynan ba? Joq álde odan ózge nárse me? Adamnyń nápsisi úshin eń aýyr amal ne?

Adamnyń nápsisi jasaǵan amaly úshin maqtaýdy, kórinip qalýdy, sol is úshin syılyq alýdy súıetin bolǵandyqtan yqylas oǵan óte aýyr keledi. Sondyqtan Sáhl Át-Týstarı: «Nápsige eń aýyr tıetin nárse ne» degen suraqqa: «Nápsige eń aýyr tıetin nárse – yqylas, sebebi yqylaspen jasalǵan amalda nápsiniń eshbir úlesi joq», – degen. Máselen, «Namazdy jurttyń bári oqyp jatyr ǵoı; jasym da kelip qalypty, namaz oqymasam bolmaıdy eken» nemese «El namaz oqıtyn adam eken dep oılasyn» degen maqsatpen emes, Alla Taǵala adamdy Qııamette eń birinshi namazdan suraqqa alatyn bolǵany úshin, Namaz – jánnáttiń kilti, kúnálarymyzdan tazalaýshy, Allaǵa jaqyndaýdyń eń bıik shyńy, tilekterdiń qabyl bolýynyń kópiri bolǵany úshin oqysańyz, yqylaspen oryndaǵan bolasyz.

Ábý-Saǵıd Ád Hýdrı (r.a.) keltirgen hadıste Paıǵambarymyz (s.ǵ.s.): «Sender úshin Masıh-Dájjáldan da qorqynyshty ne ekenin habarlaıyn ba?» – dep suraǵanda, sahabalar: «Iá, Allanyń Elshisi», – deıdi. Sonda Paıǵambarymyz (s.ǵ.s.): «Jasyryn serik qosý – namaz oqyǵan kezde basqa kisiniń nazary aýǵandyqtan, óz namazyn kórkeıtýi»,[1] — degen eken. Nıetimiz adal, yqylasymyz sútteı taza, qulshylyǵymyz qabyl bolsyn, aǵaıyn!!!