JAQSYLYQTYŃ JARShYSY BOLÝ
Allanyń raqymymen ashtyqtan, joqshylyqtan, qaýip-qaterden aman adamdar Allaǵa shúkir etip, qulshylyqtaryn óteýleri kerek. Osy qulshylyqty atqarý kezinde sharıǵat talap etkendeı, jetim-jesirge qamqorlyq jasap, kedeıdiń muń-muqtajyn ótep, ash adamdy toıdyrý musylmannyń mindeti. Shamasy jete tura, muny istemegenderdiń Allanyń aldynda jazasy aýyr bolatyny sózsiz.
Denesimen nemese mal-múlkimen qyzmet, qulshylyq jasamaı, dindar bolyp kórinetinderdiń azǵantaı bolsa da kómek kórsetýden jaltaryp sarańdyq tanytýy netken ókinishti jaǵdaı!
«Maǵýn» súresiniń 3-aıatynyń tápsirinde bylaı dep aıtylady.
«...Jáne ol sarań adam, qaıyrymdylyqtan alys bolǵany sonsha, kedeılerdi tamaqtandyrmaıdy, ózi de qandaı da bir ıgilikke sebepshi bolǵysy kelmeıdi. Ózi mundaı ıgi isti jasamaǵanymen qoımaı, jaqyndarynyń nemese basqa da aýqatty adamdardyń as berýine, kedeılerge qamqorlyq jasaýlaryna dáneker bolǵysy kelmeıdi, olardy munaı qaıyrly iske shaqyrmaıdy da. Tipti, basqalardyń jaqsylyq jasaýyna qyzǵanyshpen qaraıdy.»
Bul aıatta adam qolynan kelse, óz mal-múlkinen jetimderge, kedeı-kepshikke kómektessin degen nusqaý bar. Eger óziniń mundaı mal-múlki bolmasa, onda basqalardy osyndaı ıgi ister isteýge shaqyrýy kerek. Adamzat úshin qaıyrymdylyq jasaýda kenjelep qalmaýy kerek. Dármensiz kedeıdi tamaqtandyrǵan adam, oǵan óz aqysyn, rızyq-nesibesin berip, kedeıge qaryzyn ótegendeı bolady. Alla taǵala «Zarııat» súresiniń 19-shy aıatynda bylaı deıdi:
«Olardyń mal-múlkinde «suraýshynyń» (kómek suraǵandardyń) jáne «muqtajdyń» (kómek suraýdan uıalǵan kedeılerdiń) aqysy bar». Bul aıatta olardyń aqysyn óteý qatań túrde eskertilip, kedeılerdi sógýge tyıym salynǵan.
