Úıge kirgende amandasý ádebi

Sálemdesý – adamdar arasyndaǵy súıispenshilik pen tynyshtyqty ornatatyn uly ıslamdyq ádepterdiń biri. Bul – jánnat turǵyndarynyń sálemi. Alla Taǵala men Onyń Elshisi (ﷺ) musylmandarǵa, ásirese úıge kirgende, amandasýdy buıyrǵan. Úıge kirgen kezde amandasý bereke men tynyshtyq ákeledi, sondaı-aq otbasy músheleri arasyndaǵy jylýlyq pen syılastyqty saqtaıdy.

Qasıetti Quranda Alla Taǵala bylaı dep buıyrǵan: «Úılerge kirgende, ózderińe Alla tarapynan berekeli ári jaqsy sálemmen sálem berińder» (Nur súresi, 61-aıat).

Paıǵambarymyz (ﷺ) da úıge kirgende sálem berýdi ósıet etken. Ánas ıbn Málik (r.a.) bylaı deıdi: Allanyń Elshisi (ﷺ) maǵan: «Balam, úıińe kirgende sálem ber, bul sen úshin jáne otbasyń úshin bereke bolady» – dedi (Tırmızı rıýaıaty).

Eger úıde eshkim bolmasa da, sálemdesý – musylman ádebi. Alla Taǵala: «Úılerge kirgende, ózderińe sálem berińder» (Nur súresi, 61-aıat) – dep buıyrǵan. Bul aıattyń maǵynasy – úıge kirgende amandasý arqyly bereke shaqyrylady.  

Kútpegen jerden kirmeý, esik qaǵyp ruqsat suraý  
Eger adam óz úıine emes, basqa bireýdiń úıine kiretin bolsa, aldymen esikti qaǵyp, ruqsat suraýy kerek. Óz úıine kirgende de otbasy múshelerin eskertip kirgeni jón.  

Úıdegilerdiń sálemge jaýap berýi
Quranda: «Eger senderge amandassa, sender odan da jaqsy sálem qaıtaryńdar nemese dál sondaı jaýap berińder» (Nısa súresi, 86-aıat), – delingen.

Úıge kirgende amandasýdyń paıdasy
1. Úıge bereke kiredi, óıtkeni bul – Alla Elshisiniń (ﷺ) ósıeti;
2. Otbasyndaǵy tynyshtyq pen meıirimdilik saqtalady;
3. Shaıtan úıden alystaıdy, óıtkeni úıge Allanyń atymen kirgen adamǵa shaıtan jaqyndaı almaıdy;
4. Paıǵambardyń (ﷺ) súnnetin oryndaǵan bolady.

Ersaıyn SÁKENOV, «Áziret Sultan» meshitiniń ustazy