TÁŃIRDI TANÝ ıakı MOIYNSUNÝ

Qudaı bizge Qulaq berdi –

«Jaqsy sózdi tyńdasyn», - dep,

«Jamandyqty qylmasyn», - dep.

«Jarǵaǵyna jaqsy án uıyp,

Sharbaǵyna torlasyn», - dep.

 

Táńir bizge Janar berdi –

«Kózben bárin kórsinshi», - dep,

«Qudiretime sensinshi», - dep.

«Keń dúnıeniń keremetin

Kórip baryp ólsinshi», - dep.

«Kózben kórmeı senbeıtuǵyn

Kórkeýdeler kónsinshi», - dep.

«Kózi toımas ynsapsyzǵa

Kór topyraǵy tolsynshy», - dep.

 

Jaratýshy Aıaq berdi –

«Jaman jerdi baspasyn», - dep,

«Jaqsylyqtan qashpasyn», - dep.

«Denesiniń salmaǵy da

Aıaǵynan aspasyn», - dep.

«Árbir basqan qadamdary

Maǵan qaraı bastasyn», - dep.

«Artyna tek aq joly men

Adal soqpaq tastasyn», - dep.

 

Qudaı bizge Qol da berdi –

«Izgi amaldar istesin», - dep,

«Teris jolǵa túspesin», - dep.

«Zámzám sýy turǵan kezde

Záhar sýyn ishpesin», - dep.

 

Til menen Jaq berdi Táńir –

«Jaqsylyqty jar salsyn», - dep,

«Tátti sózge tamsansyn», - dep.

«Araılanyp atqan tańdy

Aq tileýmen qarsy alsyn», - dep.

 

Qudaı bizge Júrek berdi –

«Meıirimmen nurlansyn», - dep,

«Shuǵylany shulǵansyn», - dep.

«Inabatyn umytpasyn,

Imanymen qorǵansyn», - dep.

 

Táńir bizge Baýyr berdi –

«Súzgisinen ótkizsin», - dep,

«Súmbile-nur tókkizsin», - dep.

«Súıispenshilik dánin elge

Sebezgilep sepkizsin», - dep.

 

Altyn Bas ta syılady Ol –

«Aqyretti oılasyn», - dep,

«Tirshiligin joımasyn», - dep.

«Altyn bastyń ishin áman

Asyl oılar jaılasyn», - dep.

«Qabir ishi – qarańǵy-dúr,

Sham-shyraǵyn saılasyn», - dep.

«Perishte de taıǵan joldan

Pendem meniń taımasyn», - dep.

 

Qudaı bizge Sana berdi –

«Ańnan bolsyn aıyrmasy,

Aýa kóship, jaıylmasyn.

O dúnıeniń jaýabyn, - dep, -

Osy kúnnen daıyndasyn».

 

Ar men Namys berdi Táńir –

«Taptamasyn tasyrlar», - dep,

«Attamasyn asyldar», - dep.

«Adam ólse – óler, biraq

Ary ólmeıdi ǵasyrlar», - dep.

 

Jaratýshy Rýh berdi –

«Ázázildi jeńsinshi», - dep,

«Ádiletke sensinshi», - dep.

«Onyń almas qylyshynan

Ozbyr jaýyz ólsinshi», - dep.

 

Táńir bizge Nápsi berdi –

«Tán lázzatyn tatsynshy», - dep,

«Rahatqa batsynshy», - dep.

«Biraq bes kún fánıdi emes,

Baqıdy oılap jatsynshy», - dep.

 

Qanaǵat ta berdi Qudaı –

«Ózin-ózi tejesin», - dep,

«Bilsin mólsher, mejesin», - dep.

«Ynsabyń bar bolsa eger,

Yqylasty sezesiń», - dep.

 

Qudaı bizge Aýrý berdi –

«Saý kúnińdi salmaqta», - dep,

«Aıalaı bil ár ýaqta», - dep.

«Amanatqa bergen jan men

Aq tánińdi ardaqta», - dep.

«Densaýlyqtyń qadirin bil,

Aýyrǵasyn, zar qaqpa», - dep.

Emin jáne qosa berdi,

«Kúrese bil, jan baqpa», - dep.

 

Qudaı bizge Qaıǵy berdi –

«Táýbesine kelsinshi», - dep,

«Táńirine ersinshi», - dep.

«Bar menen joq, az benen kóp,

Tarazy teń bolsynshy», - dep.

 

Qýanysh ta berdi Qudaı –

«Serpilsin de sergisin», - dep,

«Janyn shattyq jelpisin», - dep.

«Myrza peıil myńǵa tatyr,

Bilsin anyq belgisin», - dep.

 

Jaratýshy Óner berdi –

«Jaquttardy jınasyn», - dep,

«Sulýlyqty syılasyn», - dep.

«Adamnyń bar múmkindigi

Arnasyna syımasyn», - dep.

 

Táńir bizge Bilim berdi –

«Bárin túgel uqsynshy», - dep,

«Túý shetine shyqsynshy», - dep.

«Kúresse de, tiresse de,

Bilimimen jyqsynshy», - dep.

 

Qudaı bizge Ǵumyr berdi –

«Ólsheýli kún ótkizsin», - dep,

«Ómir gúlin ekkizsin», - dep.

«Bir-birińdi syılaý úshin,

Bir-birińdi qımaý úshin

Bes kún tirlik berilgenin

Jer-dúnıege jetkizsin», - dep.

 

Ajaldy da jiberdi Ol –

«Ótkinshiniń mánin bilsin,

Ómiriniń dámin bilsin.

Bir-birińe qonaqsyń, - dep, -

Syılastyqtyń sánin bilsin».

 

Qudaı bizge Ana berdi –

«Qursaǵynda jaralsyn», - dep,

«Qushaǵynda balańsyń», - dep.

«Jaryq dúnıe syılaýshy bop

Jalǵyz ózi sanalsyn», - dep.

«Adamzattyń asyldary

Aq sútinen nár alsyn», - dep.

«Alpys eki tamyrynan

Adamdyq tek taralsyn», - dep.

 

Qudaı bizge Áke berdi –

«Qulamaıtyn qorǵanyń», - dep,

«Qýramaıtyn ormanyń», - dep.

«Arqa súıer asqar taýyń,

Artyq kórer ardaǵyń», - dep.

 

Táńir Týma-Týys berdi –

«Bir kindikten órsinshi», - dep,

«Birlik kúshin bilsinshi», - dep.

«Bir-birine shýaq syılap,

Birge oınap-kúlsinshi», - dep.

«Tataýy joq tátti tirlik,

Tatý ómir súrsinshi», - dep.

«Súringende súıeý bolyp,

Súıenisip júrsinshi», - dep.

 

Qudaı bizge Qosaq berdi –

«Jalǵyz ediń, egiz bol», - dep,

«Jaıdaq ediń, teńiz bol», - dep.

«Jan jaryńmen qol ustasyp,

Japyraǵyńmen segiz bol», - dep.

«Jarty ediń ǵoı, bútin bol», - dep,

«Jaıylatyn tuqym bol», - dep.

«Oshaǵyńnyń oty sónbeı,

Ordaly el, tútin bol», - dep.

 

Táńir bizge Bala berdi –

«Urpaqtaryn jalǵasyn», - dep,

«Jol ortada qalmasyn», - dep.

«Artqy kúnin oılasyn», - dep,

«Alǵy kúnin qamdasyn», - dep.

«Aq kemesin órge súırep,

Alǵa tartsyn arbasyn», - dep.

«Bolashaqqa perzentimen

Armandary samǵasyn», - dep.

 

Qudaı bizge Quziret berdi –

«Aq jolymmen júrgeısiń», - dep,

«Adal ómir súrgeısiń», - dep.

«Qulshylyqtyń hıýazyn

Tirshilikte bilgeısiń», - dep.

 

Paıǵambar da jiberdi Ol –

«Týra jolǵa bastasyn», - dep.

«Shekten shyǵyp, aspasyn», - dep.

«Jan dertine daýa taýyp,

Jahıldikti tastasyn», - dep.

 

Bárin-bárin berdi Qudaı,

Berdi Kók pen Jerdi Qudaı.

Taý men Kóldi, Jeldi Qudaı,

Ult pen Ulys, Eldi Qudaı;

Til menen Dil, Ǵylymdy da,

Bárin-bárin berdi Qudaı!

Atqan Tańmen, batqan Kúnmen

Aramyzǵa keldi Qudaı.

Kórmedik biz biraq Ony,

Al Ol bárin kórdi Qudaı.

Haq jolyna burylsaq biz,

Qaıtarǵan joq qoldy Qudaı.

 

Sol Táńirdiń nyǵmetin,

Pendelerge qurmetin;

On segiz myń bul ǵalamdy

(Dárgeıine júginetin)

Bir tarynyń qaýyzyna

Syıdyratyn qudiretin;

Barsha álemdi bas ıgizgen

Baıtaq ámir quzyretin

 

Biz baǵalaı bildik pe eken?!

Haq jolymen júrdik pe eken?!

«Ómir súrdik» degenimiz

Óz máninde tirlik pe eken?!

 

Onyń bárin kim bilipti?!

Kimder ony jyr qylypty?!

Jer shary da máńgilikke

Meken emes turǵylyqty.

 

Máńgi-baqı turǵan Qudaı!

Júregime tunǵan Qudaı!

Jumbaq Syrdyń qupııasyn

Biledi ony Bir Jar Qudaı!!!

Senerim de, súıenerim,

Senen basqa kim bar, Qudaı?!

Rahat QOSBARMAQ