Tań namazynyń paıdasy týraly A.Mashanovtyń ǵylymı dáleli

Marqum ákemniń bir qyzyq minezi bar edi. Tań qarańǵysynan turyp alyp, namazyn oqyp bolǵasyn, aıqaılap,  jurttyń bárin oıatatyn. Kún shyqqanda ólgen adam ǵana tósekte jatady deıtin. Talaı jaqtyrmaı kúńkildedik qoı. Ásirese, qonaq kelgende yńǵaısyz edi. Biraq óz degenimen ǵana júretin ákem meımannyń  kóńiline qarap jatpaıtyn. Tań atty ma, bári turý kerek, vse)))

Keshe Bekarystan Myrzabaı aǵamnan qyzyq áńgime estidim. Akademık Aqjan Mashanov Almatyda 1979 jyly oqyǵan bir lektsııasynda ıslam dini týraly áńgimelep, tańǵy namazdyń paıdasy týraly aıtypty. Bısmıllahı rahmanı rahım dep áńgime bastaǵanda biraz ǵalymdar bir-birine qarap, zaldyń ishinde sybyr-kúbir kóbeıdi deıdi. Biraq ǵalym oǵan mán bermeı, áńgimesin jalǵaı beripti. Bekzat adam ǵoı, qazirgilerdeı qorqytyp-úrkitpeı, tańǵy namazdyń paıdasyn ǵylymı túrde dáleldepti.

– Tań ata turyp, qasyńyzdaǵy adamǵa qarańyz, – depti ǵalym, – ol qaıta-qaıta jutynyp jatady. Onyń sebebi tirshilik oıandy, onyń júreginiń  soǵýy artty. Aýyz qýysyndaǵy mıkrobtar da «oıanyp», belsendi jumysqa kiristi. Onyń  uıyqtap jatyp, jutyna beretini sodan. Demek álgi mıkrobtardy ol ishine jutady. Onyń aýyrýǵa, ólýge degen «múmkindigi» ulǵaıady. Al tań namazyna turǵan adam dáret alǵanda, áli belsendi qımylǵa túse qoımaǵan aýyz qýysyndaǵy mıkrobtar shaıylyp ketedi...

...Aqylǵa qonymdy, á? Qazaqtyń kúnmen talasyp uıyqtama  deıtini de sol ǵoı...

Baýyrjan Babajanuly